Փաստ ինֆո

Արցախյան պատերազմի հետևանքով Կապան համայնքի 11 գյուղական բնակավայր մոտեցել է Ադրբեջանի հետ սահմանին, «Փաստինֆո»-ի հետ զրույցում այս տեղեկությունը հայտնեց Կապանի համայնքապետ Գևորգ Փարսյանը՝ նշելով. «Կաղնուտ, Ագարակ, Եղվարդ, Ուժանիս, Սյունիք Սովխոզ, Ճակատեն, Շիկահող, Սրաշեն և Ծավ բնակավայրերը։ Կապան համայնքն ունի սահմանամերձ տասնմեկ բնակավայր, և գրեթե բոլորն էլ արդեն մոտեցել են Ադրբեջանի սահմանին։ Ամենամոտ գտնվողը Ներքին Հանդն ու Դավիթ Բեկն են՝ 2-3 կմ է դարձել հեռավորությունը»,- ասաց համայնքապետը։

Ըստ նրա՝ խնդիրներ են առաջանալու որոշ առումով արոտավայրերի և հողերի օգտագործման հետ կապված։ Շատ գյուղացիներ օգտվում էին նախկինում թշնամու վերահսկողությունից դուրս գտնվող արոտավայրերից, հողերից ու անտառներից, հիմա դա գրեթե անհնար է դառնալու։
«Բնականաբար արոտավայրերի կրճատումը խնդիր է առաջացնելու անասնապահության հետ կապված, ինչպես նաև խոտհարքների։

Անտառների կրճատման հետ կապված, խնդիրներ կլինեն նաև կոմերցիոն նպատակներով փայտահատման աշխատանքների մասով, սակայն չեմ կարծում կենցաղի՝ ջեռուցում ապահովելու համար խնդիրներ առաջանան»,- ասաց Փարսյանը։

Հարցին՝ կա՞ն տարածքներում մշակութային օջախներ կամ գործարաններ նշեց՝ ոչ նշանակալի։

«Մեկ-երկու փոքր բաներ կան՝ ավազապոչային խառնուրդի դուրս բերման, փոքր մասշտաբներով հանքաքարերի ձեռքբերման հետ կապված, բայց փոքր են ու տնտեսության վրա մեծ ազդեցություն չունեցող»։

Տնտեսվարողները, որոնք խնդիրների առաջ են կանգնելու՝ փոխհատուցման մասին դեռ տեղյակ չեն, համայնքն էլ այդ հարցերին չի կարող պատասխանել, խնդրեցին դիմել կառավարություն։ Փաստացի 11 համայնքի բնակիչներն ապրելու են առանց անվտանգության գոտու, որքանով են բնակիչները ապահով, Փարսյանը նշեց, որ կազմակերպվում է նրանց անվտանգությունը։

«Արդեն իսկ դիրքավորված ենք, դիրքերում կանգնած են թե գյուղացիները, թե կապանցիները, նաև պաշտպանության նախարարության կանոնավոր բանակը»։

Անդրադառնալով Կապանի օդանավակայանին՝ համայնքապետ Գևորգ Փարսյանը հավելեց, որ որևիցե վտանգ չի սպառնում, քանի որ սահմանային դիրքերը օդանավակայանից շատ հեռու են․ «Ներկա դրությամբ այն բնագիծը, որ մենք զբաղեցրել ենք, գտնվում է օդանավակայանից տասնյակ կիլոմետրեր հեռու»,-ասաց նա։

Սյունիքի մարզպետարանի գլխավոր քարտուղար Էդգար Մարտիրոսյանն էլ ընդգծեց, որ մինչև այս պատերազմը այդ սահմանամերձ բնակավայրերում դիրքեր չեն եղել, և պատերազմի ժամանակ են կահավորվել հայկական դիրքերը
«Մեր մոտ սահմանագծի փոփոխություն տեղի չի ունեցել։ Ես չգիտեմ ինչ փոփոխություն է սպասվելու, ասում եմ այն վիճակը, որն այսօր կա, հետո ինչ է լինելու՝ կներեք չեմ կարող պատասխանել»։

Կապանը, Գորիսը և Տող համայնքը նախկինում սահմանամերձ էին Արցախին, հիմա սահմանամերձ են դառնում Ադրբեջանին։ Այստեղ ևս առաջացել են սոցիալ-տնտեսական խնդիրներ։

«ԱՀ Քաշաթաղի շրջանի հարավային հատվածը ՝ Կովսականի ենթաշրջանում Սյունիքի մարզի բավականին թվով ֆերմերներ իրականացնում էին տնտեսական գործունեություն։ Այդ թվում նաև ԱՀ բավական թվով ֆերմերներ, Սյունիքի մարզի Գորիս համայնքի Խնձորեսկ համայնքից, Տեղ համայնքի բնակավայրերից բավականին մեծ քանակությամբ ֆերմերներ պահում էին մանր, խոշոր եղջերավոր անասուններ ու դաշտավարությամբ էին զբաղվում, փաստացի արդեն չեն կարող զբաղվել»,- ասաց Մարտիրոսյանը, որը ևս դժվարացավ ասել, թե ինչպես է կատարվելու բնակիչների փոխհատուցումը։

Աղբյուր` Փաստինֆո