Փաստ ինֆո

Ի՞նչ ակնկալիքներ ունի ՀՀ-ում վարչապետի աթոռը զավթած անձը, երբ ԵԱՏՄ առցանց ընթացքող նիստի ընթացքում բարձրաձայնում է արցախյան պատերազմում գերեվարված և անհետ կորած զինծառայողների հետ վերադարձի հարցը, այն պարագայում, երբ ինքը, հրադադարից 25 օր անց, որևէ քայլ չի կատարել այս ուղղությամբ: Քաղաքագետ Երվանդ Բոզոյանը «Փաստինֆո»-ի հետ զրույցում արձանագրում է՝ այսպիսի վարքը նորություն չէ գործող վարչապետի համար.«Բոլոր հարցերում պատասխանատվությունից խուսափելու համար, այս մարդն իր ստեղծած խնդիրները դնում է այլոց ուսերին՝ քաղաքացիների, տարբեր քաղաքական ուժերի, հիմա էլ, քանի որ գերիների և անհետ կորածների խնդիր է առաջացել, այս հարցն էլ, փաստորեն, փորձում է, իր խելքով բարդել Ռուսաստանի Դաշնության վրա: Հավանաբար, նա մտածում է, որ Ռուսաստանի Դաշնությունն, ի տարբերություն իրեն, կարող է որոշակի ազդեցություն ունենալ ադրբեջանական կողմի վրա»:

Քաղաքագետն ընդգծում է՝ չմոռանանք այն փաստը, որ հայկական կողմից այդ համաձայնագիրը կնքողն, ի սկզբանե, հաշվի չի առել գերեվարվածների և անհետ կորածների վերաբերյալ խնդիրը: Այս մարդու վարքագծում որևէ նորություն ես չեմ տեսնում, ասում է Երվանդ Բոզոյանը, հավելելով, որ վերջին 2.5 տարվա ընթացքում նա բացարձակ նույն պահվածքն է դրսևորել, ցավոք, ոմանց համար դա տեսանելի չի եղել, կամ չեն ցանկացել նկատեն:

Ի՞նչ հետևանքներ դեռ կարող է կրել պետությունը, վարչապետի աթոռը զավթած անձի համառության արդյունքում, որով վերջինս ոչ մի կերպ չի ցանկանում հաշվի նստել իր կողմից թույլ տված դավաճանական գործողությունների հետևանքների հետ և, հետևաբար, ուժ գտնել իր մեջ՝ լքելու ստանձնած պաշտոնը: Քաղաքական վերլուծաբանը նկատում է՝ տվյալ անձի՝ իշխանության մնալու ամեն օրն ու, անգամ, ժամը ահռելի ու անվերադարձ վնասներ է հասցնում Հայաստանի Հանրապետության անվտանգությանը և սա, ըստ վերջինիս, ավելի քան ակնհայտ է. «Քանի որ ինքը սա չի գիտակցում, ապա, կարծում եմ, որ դա պետք է գիտակցեն հասարակության լայն շերտերն ու քաղաքական ուժերը և այս պահի բոլոր երկրորդական հարցերը մի կողմ թողնելով, կոնսոլիդացվեն, ձևավորեն ժամանակավոր իշխանություն, ընտրություններ անցկացնեն և նոր, օրինական իշխանություն ձևավորեն: Սա, իսկապես, խիստ վտանգավոր իրավիճակ է: Ըստ էության, ընթացող պատերազմի քառասնօրյա բացահայտ ստից հետո, մարդիկ էլ ոչնչի չեն հավատում: Նրա ցանկացած խոսք, եթե նույնիսկ համարենք, որ դա կարող է ճշմարտություն լինել, միևնույն է, որևէ տեսակի հավատ չի ներշնչում: Նա այլևս ունակ չէ որևէ լուրջ քայլ կատարել և, բնական է, որ այս ամենի արդյունքում, պետական ապարատն օր - օրի փլուզվելու է, ինչն էլ, ի դեպ, արդեն տեղի է ունենում: Մենք տեսնում ենք, որ ամեն օր Ազգային Ժողովի իշխող ֆրակցիայից կամ պետական համակարգից ինչ – որ մեկը վայր է դնում իր լիազորությունները, կամ վայր դնելով մանդատը՝ դուրս գալիս ֆրակցիայից և այլն: Այսպիսի պայմաններում, շատ կարճ ժամանակի ընթացքում, պետական համակարգն ուղղակի և բառացիորեն կպարալիզացվի»:

Հարցին՝ ի՞նչ իրավական ճանապարհներով կարելի է ազատվել այս անձից, եթե ստեղծված իրավիճակում, այն է՝ ռազմական դրության պայմաններում, ՀՀ Սահմանադրությունը որևէ իրավական լծակ չի թողնում՝ պահանջելու անգործունակ և կապիտուլյանտ ղեկավարի հեռացումը, քաղաքական վերլուծաբանը պատասխանում է՝ քայլերի ճշգրիտ կազմակերպման և քաղաքական ուժերի գրագետ կոնսոլիդացիայի պարագայում, զգալով նաև հանրային ճնշումը, իշխանությունները տեղի կտան.«Թվարկածս պայմաններն ապահովելու դեպքում, իշխող ուժը կգիտակցի, որ չունի այլևս այլ քայլ, քան զիջումների գնալն է, հակառակ դեպքում՝ ուշանալու պարագայում, այն հումանիտար միջանցքը, որ դեռևս կա իրենց համար, կարող է փակվել»:

Խոսելով ստեղծված իրավիճակում ռուսաստանյան կողմի դերակատարության մասին, Երվանդ Բոզոյանը նկատում է՝ Ռուսաստանն այսօր այստեղ կարող է կարևոր դերակատարություն ունենալ, հատկապես՝ հումանիտար միջանցքի ապահովման հարցում. «Հասարակությունն այսօր խիստ լարված և զայրացած է: Սրանից բխող՝ էմոցիոնալ վիճակի մեջ, մարդիկ կարող են համապատասխան քայլերի գնալ: Հասկանալով այս իրավիճակը, Ռուսաստանի Դաշնությունը, որպես մեր ռազմավարական գործընկեր, կարող է,իսկապես, կանխել սպասվող էմոցիոնալ պայթյունը և, հումանիտար միջանցք ապահովելով իշխանությունների համար, հնարավորություն տա նրանց խաղաղ ճանապարհով հեռանալ իշխանության ղեկից: Իհարկե, նրանց պատասխանատվության խնդիրը կա և այս առումով լուրջ հետաքննություն պետք է իրականացվի՝ պարզելու և հայտնաբերելու ստեղծված իրավիճակի բոլոր մեղավորներին և պատասխանատուներին, բայց, առաջին հերթին, հիմա օրակարգում այս իշխանությունների խաղաղ և անցնցում հեռացման հարցն է դրված, որպեսզի, հանկարծ, նորից մեր երկրում նոր արյունահեղություն չլինի»,- ասում է քաղաքական վերլուծաբան Երվանդ Բոզոյանը, «Փաստինֆո»-ի հետ զրույցում:

Հեղինակ՝ Նվարդ Մանվելյան

Աղբյուր` Փաստինֆո