Փաստ ինֆո

Նաիրա Զոհրաբյանը գերիների հարցով պաշտոնական նամակով դիմել է ԵԽԽՎ նախագահին, ՄԱԿ-ի գլխավոր քարտուղարին, ԵԽ խոշտանգումների կանխարգելման հանձնաժողովին, միջազգային բոլոր կառույցներին, պատերազմի օրերի ընթացքում ամենօրյա կապի մեջ է եղել եվրոպացի գործընկերների հետ, ՌԴ պետդումայի փոխնախագահի հետ, հանձնաժողովի նախագահների հետ։ ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը լրագրողների հետ զրույցում ասաց, որ ամբողջ թարմացվող տեղեկությունը՝ ադրբեջանցիների կողմից մեր ռազմագերիների խոշտանգումների, գլխատումների և անմարդկային վերաբերմունքի վերաբերյալ, ուղարկված է միջազգային կառույցներին։

Զոհրաբյանն անդրադարձավ նմաև մամուլում շրջանառվող տեղեկություններին առ այն, որ առաջիկա ռազմաշքերթի ժամանակ պատրաստվում են շքերի հանել նաև մեր ռազմագերիներին՝ նշելով, որ դա համարվում է ռազմական հանցագործություն։

«Միջազգային կառույցների պատասխանատուները վստահություն են հայտնել, որ կանեն առավելագույնը, որ ռազմական շքերթի ընթացքում, որը ենթադրաբար Ալիևյան խունտան նախապատրաստում է, չլինեն մեր ռազմագերիները և նվաստացման այդ ծիսակարգը չանցնեն, որովհետև դա միջազգային կոնվենցիայով համարվելու է ռազմական հանցագործություն »,- նշեց Զոհրաբյանը՝ ավելացնելով, որ Թուրքիան և Ադրբեջանն արդեն այնքան ռազմական հանցագործություններ են կատարել, որ հույս ունի, որ այս մեկ ռազմական հանցագործությունը չի կատարի և ՄԱԿ-ի գլխավոր քարտուղարը, ԵԽԽՎ նախագահը, միջազգային կառույցները գոնե մեկ անգամ կբռնեն Ադրբեջանի ձեռքը։

Զոհրաբյանի խոսքով՝ բոլորիս մտահոգությունը պետք է լինի ռազմագերիների վերադարձը։

«Բնականաբար, հույս ունենալ, որ այս իշխանությունը, որովհետև Հայաստանում այսօր իշխանություն չկա, կա մեկ անձնավորություն, որն ամեն օր ինչ-որ մեմուարներ է գրում ֆեյսբուքյան էջերում, մտածել, որ այդ անձը կարևող է զբաղվել ռազմագերիների հարցով՝ նոնսենս է»,- ասաց նա՝ նշելով, որ ինչքան շատ այդ մարդը մնա պաշտոնին, այդքան ռազմագերիների վերադարձի հարցը կմնա մշուշոտ։

Աղբյուր` Փաստինֆո