Փաստ ինֆո

«Ուզում էինք հասկանալ ինչքանո՞վ Սոթքը կարելի է համարել անվտանգ։ Մենք մեր հույսը էլի դնելու ենք մեր զինվորականների վրա, նրանք պիտի կարողանան մեր անվտանգության երաշխավորը լինել»,- այս մասին Սոթքում՝ լրագրողների հետ զրույցում ասաց անկախ պատգամավոր Թագուհի Թովմասյանը։ Նա և ԱԺ ԲՀԿ-ական պատգամավոր Նաիրա Զոհրաբյանն այցելել են սահմանային կետ՝ հանքի տարածք։ 

Պատգամավոր Նաիրա Զոհրաբյանը նշեց, որ իրենց կանգնած կետից (Սոթքում) 3,5 կմ այն կողմ ավարտվում է ՀՀ պետական սահմանը։ Իսկ նոր ձևավորվող սահմանային կետում միմյանցից 1,5 մետր հեռավորության վրա տեղակայնված են հայկական և ադրբեջանական բանակի ներկայացուցիչները։

«Փորձեցինք հասկանալ, ինչպես է կատարվելու սահմանազատումը, սակայն այնտեղ զինվորներին էին, այդ հարցին պատասխանել չէին կարող։ Թե ադրբեջանական սահմանը դեռ ինչքա՞ն է մտնելու մեր հայրենիքի մեջ, այս պահին դժվար է ասել։ Տարբեր թվեր են ասում՝ 2, 3, 4 կմ գալու են առաջ։ Այսինքն, Սոթքի հանքավայրի մի հատված, ըստ էության, մնալու է Ադրբեջանին»։

Ըստ պատգամավորի՝ ամենախոշոր հարկատուի հանքի մեծ մասը մնում է ադրբեջանական հատվածում, սակայն տոկոսային հարաբերակցությամբ չնշեց։ Զոհրաբյանն ասաց, որ դա էլ կասի վարչապետը՝ լայվով։

«Հեռվում տեսանք ռադիոլոկացիոն մեքենա, երևի սահմանազատում են անելու։ Երեկ մեր զինվորները դիրքավորված են եղել այլ վայրում, հիմա մեծ թվով զինվորականներ լուռ կանգնած էին, իսկ 1,5 կմ հեռավորության վրա ադրբեջանական դրոշն էր»,- ասաց պատգամավորը։

Թագուհի Թովմասյանն էլ նշեց՝ նախ պետք է հասկանալ ջեռուցման ապահովման և այլ տեխնիկական հարցեր։

«Կոչը հետևյալն է՝ մենք անվտանգ ենք, հայկական զինուժը պահպանում է մեր եղած սահմանները։ Ինչ կլինի հետո՝ կհասկանանք»,- ասաց Թագուհի Թովմասյանը։

Պատգամավորները հանդիպում են կորպուսի հրամանատարին՝ հասկանալու հայրենիքի վերջին սահմանը որտեղ է լինելու։

Հիշեցնենք, որ Հայաստանի և Ադրբեջանի միջև սահմանագծման հետևանքով Սոթքի հանքավայրի որոշ հատված անցնում է Ադրբեջանին։

Աղբյուր` Փաստինֆո