Փաստ ինֆո

Ռազմական դրությամբ արգելված է հավաքներ կազմակերպել, անցկացնել, բայց ականատես ենք լինում, որ խտրական մոտեցում է ցուցաբերվում։ Այս մասին լրագրողների հետ զրույցում ասաց ԱԺ պատգամավոր Անի Սամսոնյանը։

«Տեսանք նաև, որ Հրապարակում այդպիսի ակցիա եղավ Նիկոլ Փաշինյանի կողմնակիցների կողմից և որևէ մեկն այդ կապակցությամբ բերման չենթարկվեց։ Եթե թողնում ենք, որ լինեն հավաքներ, պետք է թողնենք բոլորին։ Եթե չենք թողնում, պետք է բոլորին արգելվի, հավասար մոտեցում ցուցաբերվի»,- նշեց Սամսոնյանը։

ԱԺ նույն խմբակցության պատգամավոր Կարեն Սիմոնյանն էլ ավելացրեց, որ այս իշխանությունը բազմիցս կիրառել են երկակի ստանդարտներ, սա էլ բացառություն չէ և այս պահի դրությամբ ռազմական դրությունն ինքնանպատակ է և դրա համար էլ վաղն ԱԺ «ԼՀԿ» խմբակցությունը հրավիրել է արտահերթ նիստ՝ ռազմական դրությունը չեղարկելու, որովհետև սա որևէ այլ նպատակի, քան մարդկանց լռեցնելն է, չի ծառայում։
Անդրադառնալով Գագիկ Ծառուկյանի մանդատից զրկելու հարցի վերաբերյալ ՍԴ դիմելու մասին որոշմանը՝ Սամսոնյանը նշեց, որ պատերազմից հետո Հայաստանում շատ խնդիրներ են կուտակված, բոլորս փորձում ենք լուծել գերիների խնդիրը, զբաղվել անհետ կորածներով, սոցիալ-տնտեսական աղետ է երկրին սպասվում, բայց այս իշխանությունը դասեր չի քաղել նույնիսկ պատերազմի պարտությունից, հակառակ դեպքում՝ չէր շարունակի այս ներքաղաքական բազարների թեման։

«Սա ներքաղաքական բազար է և նաև զարմանալի է այն, որ, երբ մենք մեր ԱԺ իշխանական գործընկերներին ասում ենք՝ եկեք խորհրդի նիստում քվորում ապահովեք, եկեք ԱԺ նիստում քվորում ապահովեք, մենք քննարկենք այն փաստաթուղթը, որը մեզ բոլորիս համար չարիք է դարձել՝ մարդիկ չեն գալիս, բայց մարդիկ պատրաստ են գնալ և քվորում ապահովել մի նիստում, որտեղ քննարկվում է Գագիկ Ծառուկյանի՝ մանդատից զրկվելու հարցը»,- նշեց Սամսոնյանը՝ հավելելով, թե այդ հարցերն ու՞մ են հետաքրքրում։

Կարեն Սիմոնյանը, շարունակելով գործընկերոջը, նշեց. «Բացի դա ում է օգուտ տալիս՝ պետությանը, փախստականներին, մարդիկ, որոնք ունեն սոցիալական խնդիրներ օգուտ ունե՞ն դրանից, պետական ինստիտուտը դրանից շահո՞ւմ է »։

Ըստ նրա՝ անիմաստ էներգիայի ծախսումից չենք շահում, մենք ունենք խնդիրներ, որոնք հրատապ են՝ օր առաջ լուծելու համար։

«Ինչու՞ ամբողջ ԱԺ հնարավորությունները ծառայեցնենք մի անիմաստ նպատակի համար, որը ոչ մի օգուտ չի տալու»,- նշեց պատգամավորը։

Մանրամասները՝ տեսանյութում։

Աղբյուր` Փաստինֆո