Փաստ ինֆո

Բազմաթիվ գյուղերի բնակիչներ՝ թուրքերից են իմանում, որ պետք է գյուղն ազատեն, - «Փաստինֆո»-ի հետ զրույցում ասել է ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Նաիրա Զոհրաբյանը՝ նշելով, որ գրավոր դիմել է Արցախում ռուսական խաղաղապահ զորքերի ղեկավար Ռուստամ Մուրադովին։

«Գրավոր դիմել եմ Արցախում ռուսական խաղաղապահ զորքերի ղեկավար Ռուստամ Մուրադովին, ցանկանում եմ անմիջապես մեկնել Արցախ՝ նրա հետ հանդիպելու համար, որովհետև շատ մտահոգիչ տեղեկություններ կան։ Այս իշխանությունների քաոսի պատճառով բազմաթիվ գյուղերում, օրինակ՝ Վազգենաշենում և այլ գյուղերում, մեր հայրենակիցները գյուղ մտած թուրք լամուկներից են իմանում, որ գյուղը պիտի ազատեն»,- նշեց նա։

Բացի այդ՝ փորձում են աշխատանքներ տանել Ադրբեջանում հայտնված հայ ռազմագերիների կյանքի իրավունքի երաշխիքներ ստանալ միջազգային կազմակերպությունների միջոցով նաեւ։Ն.Զոհրաբյանի փոխանցմամբ՝ տեղեկություն ունեն բազմաթիվ ռազմագերիների մասին, ամենօրյա կապի մեջ է նրանցից շատերի ծնողների հետ, կապ է հաստատվել նաեւ գերեվարված 18 տարեկան Էրիկ Խաչատրյանի հոր՝ Սարիբեկի հետ։ Նշենք, որ Էրիկի գերեւարված լինելու մասին տեսանյութը տարածվել էր օրերս։
«Իրենք ինձ փոխանցում են այն տեղեկատվությունը, որն այս պահին իրենք տիրապետում են՝ որտե՞ղ է եղել, վերջին անգամ կապը որտեղի՞ց է եղել իրենց հետ»։

Նաիրա Զոհրաբյանը նշեց, որ ամենօրյա ռեժիմով տեղեկատվությունը փոխանցում է միջազգային կառույցներին, Եվրոպայի խորհրդի մարդու իրավունքների հանձնակատարին։ Հանձնաժողովի կողմից նաև Կարմիր խաչին է ուղարկել պաշտոնական նամակ, ապա նույնը՝ եվրոպացի այն գործընկերներին, ովքեր զբաղվում են գերիներով, ռազմագերիներով։ Հանձնաժողովի նախագահն օգտագործել է ոչ միայն պաշտոնական խողովակները, այլև անձնական կապերը եվրոպական կառույցներում, որպեսզի փորձեն հնարավորինս ներազդել Ադրբեջանի վրա՝ գերիներին, ռազմագերիներին, քաղաքացիական անձանց չվնասելու և նրանց վերադարձը Հայաստան ապահովելու համար։

«Երբ ծնողը՝ 30 օր իր որդուց լուր չունի և հանկարծ տեսնում է, որ գերի է, ուրախանում է, ասում է՝ «փառք աստծո, որ ողջ է, որովհետև մտածում էինք, որ մեր որդին այլևս չկա»-- արձանագրեց պատգամավորը՝ ավելացնելով. «բնականաբար, հասկանալի է՝ ի՞նչ վիճակի մեջ են մեր գերիները՝ երբ նրանց ստիպում են ասել ինչ-ինչ տեքստեր։

«Որևէ մեկը չի կարող հասկանալ, թե ինչ վիճակում է գտնվում գերին, որին ստիպում են ասել այդպիսի տեքստեր։ Սա արհավիրք է, բայց ծնկներին խփելու, լացուկոծ անելու փոխարեն եկեք ամեն մեկս մեր տեղում մեր գործն անենք։ Խորհուրդ եմ տալիս այն դեմագոգ պատգամավորներին, ովքեր բնակվում են ֆեյսբուքում և ովքեր իրենց արած մի հատ սիսեռահատիկը փորձում են ներկայացնել որպես դարի հերոսացում, պարզապես լռեն և ամոթ ունենան»,- նշեց Ն.Զոհրաբյանը

Բանախոսը ցինիկ գրառում որակեց իմքայլական պատգամավոր Սոֆյա Հովսեփյանի ֆեյսբուքյան հայտարարությունը, թե, իբր, Մարդու իրավունքների հանձնաժողովը այս հարցերով չի զբաղվում։ «Տիկին Հովսեփյան, ես չգիտեմ ինչո՞վ եք զբաղվում և ո՞վ եք դուք ընդհանրապես, և ձեր առաքելությունը ի՞նչ է եղել այս տարիների ընթացքում որպես պատգամավոր, հանձնաժողովն անում է իր գործը, հանձնաժողովի իմքայլական պատգամավորները ևս անում են իրենց գործը, շատ դեպքերում գործն այնպիսին է, որ ամեն մի արածը չենք ճպացնում ֆեյսբուքի մեր էջում։ Ամոթ ունեցեք և գոնե հիմա էս դավաճանական կապիտուլյացիային սատարելուց հետո լռեք և կտրեք ձեր ձենը, գոնե հիմա»,- ասաց հանձնաժողովի նախագահը։

Աղբյուր` Փաստինֆո