Փաստ ինֆո

ԱԺ նախկին պատգամավոր Միհրան Հակոբյանն ազատ կարձակվի։ Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, բավարարել է Միհրան Հակոբյանին ձերբակալելու մասին որոշման դեմ պաշտպանի բողոքը ու ոչ իրավաչափ ճանաչել Հակոբյանի ձերբակալությունը։ Պաշտպան Միքայել Շիխիմյանը «Փաստինֆո»-ի հետ զրույցում ասաց, որ Հակոբյանը շուտով ազատ կարձակվի ՁՊՎ-ից։ 

Փաստաբանը տեղեկացրեց, որ դատարանի որոշմանն ամբողջությամբ դեռ չի ծանոթացել, բայց դատարանն ամբողջությամբ ոչ իրավաչափ է ճանաչել ձերբակալման որոշումը՝ և՛ հիմքերի, և՛ նպատակների տեսանկյունից։

Բացի դա՝ Միհրան Հակոբյանի ձերբակալությունը բացառող հանգամանք ևս կա․ նա խնամքին ունի մինչև 8 տարեկան երեխա, իսկ ձերբակալում են այն անձանց, որոնց նկատմամբ կարող են կիրառել պատիժ կալանքի տեսքով։ Մասնավորապես, ՀՀ քրեական դատավարության օրենսգրքի 57-րդ հոդվածի 2-րդ մասի համաձայն, կալանքը չի նշանակվում դատավճիռը կայացնելու պահին խնամքին մինչև ութ տարեկան երեխա ունեցող անձանց նկատմամբ և այս համատեքստում հարկ է նշել, որ Հակոբյանը խնամքին ունի մինչև ութ տարեկան մեկ երեխա. ՀՀ քրեական դատավարության օրենսգրքի 128-րդ հոդվածի 2-րդ մասի համաձայն՝ ձերբակալել կարելի է միայն անձին, որը հիմնավոր կերպով կասկածվում է այնպիսի հանցագործության մեջ, որի կատարման համար կարող է նշանակվել պատիժ։ Փաստաբանի խոսքով՝ Հակոբյանը չէր կարող ձերբակալվել, քանի որ արարքը, որում կասկածվում է վերջինս, ազատազրկման ձեւով պատիժ չի նախատեսում, այլ միայն կալանք, որը, ինչպես արդեն նշեցինք, օրենսգրքի համաձայն, չի կարող կիրառվել խնամքին մինչեւ ութ տարեկան երեխա ունեցող անձանց նկատմամբ։

Ինչպես արդեն տեղեկացրել ենք Հակոբյանը ձերբակալվել է Քննչական կոմիտեում քննվող քրեական գործով՝ ՀՀ քրեական օրենսգրքի 225.1-րդ հոդվածի կասկածանքով՝ օրենքով սահմանված կարգի խախտմամբ հավաքներ կազմակերպելու համար։

Ավելի վաղ տեղեկացրել ենք, որ Հայաստանի տարբեր մարզերում և մայրաքաղաք Երևանում բազմամարդ ակցիաներ են իրականացվում՝ կապիտուլյացիայի և Արցախը Ադրբեջանին հանձնելու մասին հայտարարություն ստորագրած Նիկոլ Փաշինյանի հրաժարականի պահանջով՝ իրենց անհամաձայնությունը հայտնելով Փաշինյանի դավաճանական գործողություններին։ Իշխանությունները բողոքի ակցիաները ճնշելու համար անցել են բիրտ գործողությունների։

Բողոքի ակցիաներ կազմակերպելու համար քրեական գործեր են հարուցվել թե քննչական կոմիտեում եւ թե ՀՔԾ-ում:

Հեղինակ՝ Իզաբել Սահակյան

Աղբյուր` Փաստինֆո