Փաստ ինֆո

«Շուրջ 2,5 տարի ՀՀ-ում ձևավորվեց կեղծ օրակարգ՝ ներկայացնելով հայերիս, թե երկրի թիվ մեկ խնդիրը Ստամբուլյան կոնվենցիան է։ Ամենաբարձր պաշտոնյայի մակարդակով ընտանքիի ինստիտուտը, պատմության հիմնախնդիրները, եկեղեցին էին խարխլում։ Հայ ազգ միշտ փորձություններ տեսել է և չի եղել փորձություն, որ ի վերջո պատվով չհաղթահարի»։ Այս մասին Ազատության հրապարակում՝  վարչապետի հրաժարականի պահանջով հանրահավաքին,  ասաց ԱԺ փոխնախագահ, «Բարգավաճ Հայաստան» խմբակցության անդամ Վահե Էնֆիաջյանը։

Նշեց, որ բոլորը շատ լավ հասկանում են, թե այս օրերի ընթացքում ինչ դավաճանական գործողություններ են տեղի ունեցել։ Ապագայում մանրակրկիտ տեղեկացնելու են ամբողջ հայությանը, թե ինչ չի արվել։

«Այսօրվա իշխանությունը, Կառավարության ղեկավարը, նախարարները բարոյական և քաղաքական իրավունք չունեն պաշտոնավարել։ Պարտված անձը, պարտված պաշտոնյան, ձախողած, բացթողումների մեջ թաղված անձինք իրավունք չունեն պաշտոն զբաղեցել և ներկայացնել Հայաստանի Հանրապետությունը»։

Էնֆիաջյանը վստահեցրեց, որ քաղաքական գործիչների, ընդդիմախոսների նկատմամբ հետապնդումներ իրականացնելով որևէ արդյունքի իշխանությունը չի հասնելու։

«Քրեական գործեր հարուցելով, հետապնդումներ իրականացնելով ինչի եք հասնելու, որքա՞ն եք պառակտելու մեր փոքր ժողովրդին։ Թույլ չենք տալու, պետք է հեռանաք։ Միավորվելու ենք, մեր միասնական նպատակները ձևակերպելու ենք և հաջողելու ենք։ Ով էլ որ գա, որ ուժերն էլ գան, դուք թողել եք շատ բարդ վիճակ։ Դուք եք այսօր պաշտոնի կռիվ անում, դուք եք այսօր կառչել ձեր աթոռներից։ Այդ վատ վիճակը ստեղծել եք և խորացնում եք այդ վիճակը»,- նշեց նա։

Էնֆիաջյանն ասաց՝ ժառանգություն են թողել  շատ բարդ վիճակ։ Հիմա պետք է ռազմավարական գործընկերոջ հետ կարողանան ապագայի հարաբերություններ կառուցել։

«Տարածաշրջանում արդեն տեսնում ենք՝ թշնամի պետությունն ինչպիսի հռետորաբանություն է զարգացնում: Հայաստանին փորձում են պահանջ ներկայացնել, որ 50 մլրդ դոլար տույժ վճարի: Ո՞րն է մեր դիվանագիտական պատասխանը, ո՞ր սերունդներին եք թողնելու»,-ասաց նա՝ ավելացնելով, որ ՀՀ-ից ոչ մի պատասխանատու պաշտոնյա չի կարող փախչել, բոլոր մեղավորները պատասխան են տալու:

Աղբյուր` Փաստինֆո