Փաստ ինֆո

«Մենք ունենք խնդիր, որն է՝ այսօր մեր երկրի փրկությունը»-այս մասին Ազատության հրապարակում վարչապետի հրաժարականի պահաջով հանրահավաքից հետո լրագրողների հետ զրույցում ասաց «Հայրենիք» կուսակցության ղեկավար Արթուր Վանեցյանը։

Քաղաքական գործչի խոսքով՝ այսօր մեր խնդիրը մեր հայրենիքի փրկությունն է՝ հանուն մեր իսկ ապագայի, և օրուգիշեր պետք է անել ամեն ինչ՝ հաղթահարելու ստեղծված իրավիճակը:

«Դուք տեսա՞ք՝ երեկ ինչ եղավ Հանրապետության հրապարակում: ՀՀ դրոշը ծածանելու համար երիտասարդ աղջիկներին ու տղաներին ծեծելով, ջարդուփշուր անելով՝ բերման ենթարկեցին, ընդհանուր առմամբ՝ 85 մարդու: Նա փորձում է բիրտ ուժ կիրառել, վախեցնել մարդկանց, որ փողոց դուրս չգան, բայց չի կարող»,-ասաց Վանեցյանը:

Ըստ Արթուր Վանեցյանի՝ պատերազմը սկսվել է զուտ մի բանի համար, որ Նիկոլ Փաշինյանն իր ապաշնորհ և ապիկար քաղաքականության արդյունքում հասցրել է այս կետին։
«ԳՇ պետը հայտարարում է, որ պատերազմի 4-րդ օրը զեկուցել է, որ ունենք խնդիր՝ չենք կարողանում դիմակայել ագրեսիային։ Փաշինյանը, փոխարեն հասկանա ինչ է կատարվում, ինչպես միշտ որոշում չի կայացրել»։

Իսկ հարցին, որպես վարչապետի թեկնածու, իր անունը ներկայացնելո՞ւ է, նշեց, որ պատրաստ է կրել այդ պատասխանատվությունը։ Արթուր Վանեցյանը ներկայացրեց մեկ այլ բացահայտում։

«Երբ որ Երևանի ավագանու ընտրությունների ժամանակ հնչեց սև ու սպիտակ եզրույթը, ես որպես ԱԱԾ տնօրեն՝ դրա մեջ ռիսկեր տեսա, որ դա ի վերջո բերելու է հասարակոթյան պառակտմանը և հասարակությունը ինչ որ մի փուլում բախումների է գնալու։ Ասացի, որ այդ եզրույթը վտանգավոր է և պետք է անմիջապես փակել այդ թեման։

Վարչապետի պաշտոնը ստանձնող անձն ասաց, որ իբր ես քաղաքականությունից չեմ հասկանում և «պետք է հասարակությանը կիսել սևեր և սպիտակների։ Սպիտակները հաղթողներն են ու լավը՝ այսինքն մենք, սևերը պարտվողներն են, նախկինները։ Ու քանի դեռ կան սևեր ու սպիտակներ ու ուրիշ ոչ ոք չկա, մարդիկ պետք է ընտրություն կատարեն»։

Փաշինյանը՝ հասարակությունը արհեստական բաժանելով, քանդեց բոլոր կուսակցությունների քաղքական օրակարգը, բերեց օրակարգ սև ու սպիտակը, ատելությունը և մարդը այլընտրանք չուներ։ Հենց մարդն ասում էր «ես ոչ մի գույն չեմ», իրեն ասում էին դավաճան։ Սա է խնդիրը՝ մանիպուլյացիան»։

Ըստ Արթուր Վանեցյանի՝ Նիկոլ անունը հայոց լեզվի բացատրական բառարանում լինելու է «Դավաճան» բառի հոմանիշը։

«Հասկացեք, սառեք, սթափվեք։ Երկիր ենք կորցնում։ 50 դրամ մարշուտկայի գինը թանկացնելու համար դուրս ենք եկել բողոքել ենք, 5-6 դրամ հոսանքի գնի համար էլեկտրիկ Երևան շարժում է սկսվել։ Երկիր ենք կորցրել։

Մեղրիի հատվածով Ադրբեջանին ճանապարհ ենք տվել։ Խաղաղապահները 5 տարով են այստեղ, աչքներս բացենք, փակենք՝ կանցի այդ ժամանակը։ Մյուս քայլը լինելու է Հայաստանը, Արցախի մնացյալ հատվածը»,- ասաց Արթուր Վանեցյանը։

Աղբյուր` Փաստինֆո