Փաստ ինֆո

Բոլորն ի սկզբանե գիտեին, որ Արայիկ Հարությունյանն ամեն մի քայլը համաձայնեցնում է Հայաստանում վարչապետի պաշտոնը զբաղեցնող անձի հետ։ Դա ինքնին անմիջապես իջեցրել է Արցախի Հանրապետության այն իմիջը, որը նա ունեցել է մինչ այդ։ Այս մասին լրագրողների հետ հանդիպման ժամանակ ասաց ՀՀ առաջին ՄԻՊ Լարիսա Լավերդյանը։

Նա հստակեցրեց՝ սկսած ԱՀ առաջին, երկրորդ, երրորդ նախագահներից միշտ եղել են դրվագներ, երբ Արցախը չէր համաձայնվում այն առաջարկությունների մի մասի հետ, որն առաջարկում էր Մինսկի խումբը, մինչդեռ Հայաստանը, որպես կանոն, բոլոր դեպքերում համաձայնվում էր. «Արցախն է, որ կարողացել է միշտ հայտնել իր անհամաձայնությունը։ Հաղթած պատերազմը շատ անգամ եղել է ի հեճուկս Հայաստանում քաղաքական ղեկավարության։ Երկրորդ նախագահը, լինելով Ղարաբաղյան շարժման, հաղթական պատերազմի ակունքներում, այդպես էլ չկարողացավ ինքնորոշման իրավունքից բացի փոխել այդ Մադրիդյան կոչված պիղծ սկզբունքների իմաստն ու հունը։ Սերժ Սարգսյանն էլ ոչ մի բան չի արել։

Պատահական չէ, որ անընդհատ նշում էին՝ գործընթացն ընթանում է։ Հույսը ինչի՞ վրա դնելով, որ չենք ստորագրելու։ Ես համոզված եմ և պրակտիկան էլ ցույց տվեց, որ Սերժ Սարգսյանը չցանկացավ անգամ այն, ինչ համաձայնվել է անձամբ ինքն իրականացնի։ Սերժ Սարգսյանն ու Նիկոլ Փաշինյանը պայմանավորվել են, թե ոչ, չունեմ հստակ տվյալներ, բայց որ Նիկոլ Փաշինյանը եկել է անելու այն, ինչ ժամանակին առաջարկել է ՀՀ առաջին նախագահը...»,-ասաց Լարիսա Ալավերդյանը։

Վերջինս ընդգծեց՝ մենք ունենք ավելի պակաս ինքնություն, ավելի պակաս ինքնիշխանություն, և դա սկսվել է ընտրությունների ժամանակ, երբ Արայիկ Հարությունյանը կարողացավ ժողովրդին համոզել, որ լինելով բավական հմուտ և հաջողակ տնտեսական ոլորտում, կարող է Արցախը տանել դեպի բարեկեցություն. «Բայց օրակարգում բարեկեցությունը չէր դրված, այլ անվտանգությունը։ Երբ տեսնում ենք, նա համաձայնեցնում է իր կառավարության և մնացած օղակների ղեկավարների ազգանունները, պետք է հասկանայինք, որ Արցախի ինքնիշխանությունը տապալվում է և եթե մենք դա տեսնում ենք, տեսնում է նաև արտասահմանը»,-նշեց Լարիսա Ալավերդյանը։

Աղբյուր` Փաստինֆո