Փաստ ինֆո

Ռազմական դրության նախագիծ բերել է կառավարությունը, ԱԺ-ն կառավարության պահանջով է այս որոշումը ընդունել և հիմա կառավորությունից չունենք ազդակ, որ ռազմական դրությունը պետք է չեղարկվի, ուստի մենք չենք մասնակցի ռազմական դրության չեղարկման վերաբերյալ արտահերթ նիստին,-այս մասին ճեպազրույցի ժամանակ ասաց ԱԺ փոխնախագահ Լենա Նազարյանը:

Անդրադառնալով նաև ՌԴ նախագահի հայտարարություններին՝ Աժ փոխնախագահը նշեց, որ հայկական կողմը, տեսնելով, որ ռազմաճակատում իրավիճակը ծանր է, փաստացի համաձայնվել է յոթ շրջանների վերադարձին, բայց Ալիևը դրան գումարել է նաև Շուշին:

«Հայկական կողմը քննարկելով այդ հարցը, մտածել է, որ անընդունելի է Շուշին հանձնել։ Փաստացի, եթե Շուշի վերադառնան փախստականները, որոնց մեծ մասը ադրբեջանցիներ են, դա կնշանակեր հանձնել Շուշին: Հայկական կողմը որոշել է շարունակել պայքարը, ինչի մասին նաև ասաց ՌԴ նախագահը: Ռազմական ղեկավարությունը մտածել է, քանի որ Շուշին բերդաքաղաք է , ապա այդ մասում կունենանք ռազմական հաջողություններ, դա տեղի չի ունեցել։ Նոյեմբերի 10-ի հայտարարությունը ընդունվել է միայն Շուշիի անկումից հետո, եթե հոկտեմբերի 19-ին կամ 20-ին Հայաստանը համաձայնվեր, որ Շուշի վերադառնային փախստականներ, մեզ մեղադրելու էին Շուշին հանձնելու համար, հիմա էլ են մեղադրում, բայց Շուշին գրավեցին, ոչ թե հանձնեցինք»,-ասաց Լենա Նազարյանը:

«Իմ քայլը» խմբակցության  պատգամավոր Արման Եղոյանն էլ ավելացրեց, որ ադրբեջանցի փախստականների Շուշի վերադառնալու դեպքում Շուշիի քաղաքապետը լինելու էր ադրբեջանցի, հավանաբար հայերի մեծ մասը դուրս կգար քաղաքից, ուստի այդ դեպքում նույնիսկ չէինք կարող ասել, որ Շուշին հայկական կողմի վերահսկողություան ներքո է:

Պատասխանելով լրագրողի այն հարցին՝ թե արդյոք իշխանության համար ընդունելի կլինի վարչապետի փոփոխություն, եթե վարչապետ ընտրվի իշխանության կազմից՝ Լենա Նազարյանը նշեց, որ ոչ դա ընդունելի չէ, քանի որ այս իրավիճակում հենց Նիկոլ Փաշինյանն է կայունացնող գործոնը.

«Նիկոլ Փաշինյանի գործոնը ավելի շատ կայունացնող է, քան՝ ապակայունացնող, ուստի չեմ պատկերացնում վարչապետի այլ թեկնածու»,-ասաց ԱԺ փոխնախագահը:

Աղբյուր` Փաստինֆո