Փաստ ինֆո

Մենք ասել ենք՝ բացառվում է հիմա ընտրություններ լինեն և եթե ինչ-որ մեկը փորձի դա նախաձեռնել, ամեն ինչ կանենք դրա դեմ։ Մենք անցնցում հեռանալու եղանակը ներկայացրել ենք։ ԱԺ-ում լրագրողների հետ զրույցի ժամանակ այս մասին ասաց ԱԺ «Լուսավոր Հայաստան» խմբակցության քարտուղար Գևորգ Գորգիսյանը։

«Փաշինյանը հեռանում է, նոր վարչապետը գալիս է, ձևավորում է ազգային համաձայնության կառավարություն, որը բաղկացած է միմիայն պրոֆեսիոնալներից։ Այսինքն այդտեղ արդեն կուսակցական պատկանելիություններն էական չեն։ Հավաքվում են մարդիկ, որոնք պետք է կարողանան երկիրն այս ծանր վիճակից դուրս հանեն։ Մեր առաջարկած տարբերակում որևէ ցնցում չի կարող լինել»,-ասաց պատգամավորը։

Դիտարկմանը, որ երեկ ԱԺ ամբիոնից Անդրանիկ Քոչարյանն ամբողջ պատասխանատվությունը դրեց բանակի, Պաշտպանության նախարարի վրա, Գևորգ Գորգիսյանն ասաց. «Պատասխանատվությունից փախնելու հերթական փորձ էր։ Ռազմական դրության ժամանակ և ամբողջ ընթացքում էլ Փաշինյանն ինքն էլ ասել է, որ ինքն է գերագույն հրամանատարը, իսկ դա նշանակում է, որ ողջ պատասխանատվությունն ինքն է կրում։ Երբ ԱԺ պաշտպանության և անվտանգտության հարցերի մշտական հանձնաժողովի նախագահը սկսում է հեռահար պատերազմ ՊՆ-ի հետ, դա խոսում է այն մասին, որ կառավարման համակարգում տոտալ քաոս է և «Իմ քայլը» որպես այդպիսին իշխանություն չունի»,-նշեց Գևորգ Գորգիսյանը։

Վերջինս նաև ասաց, որ դեռ քննարկում են՝ այսօր կմասնակցեն Կառավարության անդամների հետ հարցուպատասխանին, թե ոչ։

Աղբյուր` Փաստինֆո