Փաստ ինֆո

Իշխանությունը ձերբակալություններով փորձում է ճնշել ընդդիմությանը, այլ հարց է՝ընդդիմությունը կճնշվի, թե՝ ոչ: Դա կախված է արդեն ընդդիմության գրագետ քայլերից,-այս մասին «Փաստինֆո»,-հետ զրույցում ասաց քաղաքագետ Արմեն Բադալյանը` հավելելով, որ միայն հանրահավաքներով հնարավոր չէ արդյունքի հասնել:

Հիշեցնենք, որ արդեն երեք օր է Երեւանում տեղի են ունենում հանրահավաքներ` վարչապետ Փաշինյանի հրաժարականի պահանջով` նրա կողմից ստորագրված հայտարարությունը գնահատելով դավաճանական:

«Մենք պետք է հասկանանք՝ վարչապետը կոչ արեց, եկեք համախմբվենք, միասին հզորացնենք Հայաստանը, դա չի լինելու, քանի որ այն բարոյահոգաբանական վիճակը, որ կա Հայաստանում, թույլ չի տալու Հայաստանի զարգացումը այս իշխանությունների օրոք: Սա աքսիոմ է: Տնտեսությունը չի զարգանալու, ներդրումներ չեն լինելու, քանի որ բարոյահոգաբանական վիճակը որևէ ներդրողի չի գրավում»,-ասաց Արմեն Բադալյանը:

Վերջինս մեզ հետ զրույցում ընդգծեց՝ մենք պարտվեցինք, բայց սա մահացու հարված չէր, իսկ որպեսզի կաողանանք նորից ոտքի կանգնել, պետք է երկրի զարգացման տեսլական ունենանք, իսկ այդ տեսլականը այս իշխանությունը չունի, որովհետև չունի մտավոր պոտենցիալ:

«Տեսեք՝ այսօր ովքեր են պաշտոններին,նրանք չունեն պոտենցիալ: Նրանք չեն հասկանում աշխարհում ինչ զարգացումներ են լինում, գլոբալ և տնտեսական ինչ փոփոխություններ են տեղի ունենում, այս ամենը պետք է հասկանալ, որպեսզի նաև հասկանաս, թե դեր կարող է զբաղեցնել, որպեսզի այդ ուղղությամբ աշխատես և հասկանաս՝ինչ ես անելու Ղարաբաղի հարցը: Այս ամենը այս իշխանությունների օրոք չի լինելու»,-ասաց Արմեն Բադալյանը:

Փորձագետը հավաստիացրեց, որ այժմ ժողովրդի բարոյահոգեբանակն վիճակը բարձրացնելու համար անհրաժեշտ է առաջին հերթին խորհրդարանական արտահերթ ընտրություններ անցկացնել.

«Հնարավոր է ընտրությունների ընթացքում չփոխվեն իշխանությունները, բայց դա անհրաժեշտ է բացասական այս երևույթը լիցքաթափելու համար»:

Անդրադառնալով երեկ Հանրապետության հրապարակում ցուցադրվող տեսանյութին՝փորձագետը նշեց, որ սա հանրությանը վախեցնելու փորձ է.
«Իշխանափոխությունից հետո այդ տեսանյութի հետ կապ ունեցող բոլոր մարդիկ դատվելու են»,-ասաց քաղաքագետը:

Աղբյուր` Փաստինֆո