Փաստ ինֆո

«Բարգավաճ Հայաստան» կուսակցության ղեկավար Գագիկ Ծառուկյանի ձերբակալման որոշման դեմ բողոք է ներկայացվել։ Այս մասին «Փաստինֆո»-ի հետ զրույցում ասաց փաստաբան Սմբատ Մինասյանը։

Նշենք, որ Գագիկ Ծառուկյանը կասկածվում է ՀՀ քրեական օրենսգրքի 225.1-րդ հոդվածով նախատեսված արարք կատարելու մեջ, այն է՝ սահմանված կարգի խախտմամբ հավաք կազմակերպելը և անցկացնելը։ Նա կասկածանքի շուրջ ցուցմունք չի տվել` իր ձերբակալությունը համարելով քաղաքական հետապնդում։

Բացի դա, հոդվածը, ինքնին ազատազրկման ձևով պատիժ չի սահմանում, իսկ տուգանք նախատեսող հոդվածով ձերբակալությունը, ըստ փաստաբանի, չլսված բան է։
«Այս հոդվածը միայն տուգանք է նախատեսում՝մոտ 200.000 դրամ, կալանքը չի կարող լինել և այդ պայմաններում ԱԺ պատգամավորին ձերբակալելը պարզապես ֆանտազիայի ժանրից է»,- նշեց Մինասյանը։

Ավելին, փաստաբանն արձանագրեց, որ Գագիկ Ծառուկյանի նկատմամբ քրեական հետապնդում հարուցելու թույլտվություն ստանալու համար դատախազը պետք է դիմեր ԱԺ-ին, բայց բերեց ձերբակալեց անմիջական կասկածանքի հիման վրա, ինչն աբսուրդ է, իրավական չէ։

Ճիշտ է, Ծառուկյանը զրկվել է պատգամավորական անձեռնմխելիությունից, բայց դա տեղի է ունեցել կոնկրետ գործի շրջանակներում: «Նոր դրվագների, նոր գործերի առկայության դեպքում պետք էր դիմել դիմել ԱԺ, ինչն այս դեպքում չի արվել», - փաստեց Ս.Մինասյանը։

Ավելի վաղ տեղեկացրել ենք, որ երեկ Ազատության հրապարակում 17 կուսակցությունների կողմից հանրահավաք է իրականացվել ՝ Արցախը Ադրբեջանին հանձնելու մասին Նիկոլ Փաշինյանի ստորագրած հայտարարության դեմ։ Ազատության հրապարակը 2018թ ապրիլ-մայիսյան իրադարձություններից կամ այսպես կոչված «հեղափոխությունից» հետո այսքան մարդաշատ դեռևս չէր եղել, սակայն հեղափոխությունից 2,5 տարի անց նույն վայրում Նիկոլ Փաշինյանին դավաճան են անվանում և վերջինիս հրաժարականը պահանջում՝ հանուն Արցախի։ Մինչդեռ Նիկոլ Փաշինյանը՝ կառչած մնալով սեփական աթռոից, ռեպրեսիաների միջոցով տոտալ ձերբակալություններ է սկսել իրականացնել։ Նախ՝ հանրահավաքի ընթացքում բերման են ենթարկվել մի շարք քաղաքացիներ, որոնց թվում էին նաև հասարակական-քաղաքական գործիչներ, իսկ հանրահավաքը հայտարարած կուսակցությունների ներկայացուցիչները՝ Գագիկ Ծառուկյանը, Իշխան Սաղաթելյանը, Գեղամ Մանուկյանը, Դավիթ Համբարձումյանը, Արթուր Վանեցյանը, Արթուր Ղազինյանը, Էդուարդ Շարմազանովը և մի շարք այլ քաղաքական գործիչներ ձերբակալվել են։ Այսօր հայտնի դարձավ Արսեն Բաբայանի և Արծվիկ Մինասյանի ձերբակալության մասին։ Ուժեղացված հսկողություն է իրականացվում` քաղաքի մուտքերի նկատմամբ:

Հեղինակ՝ Իզաբել Սահակյան

Աղբյուր` Փաստինֆո