Փաստ ինֆո

«Քանի որ մեր նախորդ կոչի հանդիպումը չկայացավ, հիմա մենք կրկին դիմել ենք վարչապետին, որովհետև ունենք հարցեր, որոնք պետք է ստանան պատասխաններ»,- այս մասին ասաց «Լուսավոր Հայաստան» խմբակցության անդամ Անի Սամսոնյանը լրագրողների հետ ճեպազրույցում՝ անդրադառնալով վարչապետ Նիկոլ Փաշինյանի հետ հանդիպման՝ ԼՀԿ-ի և ԲՀԿ-ի համատեղ առաջարկին։ Սա փակ քննարկում կազմակերպելու երկրորդ առաջարկն է։

«Խորհրդարանը այն մարմինն է, որն իրավունք ունի ստանալ այնպիսի տեղեկատվություն, որը պարունակում է ռազմավարական և մարտավարական բաղադրիչ և դրանք այն հարցերն են, որոնք հրապարակային քննարկման չեն»։

Սամսոնյանը նշեց, որ իրենք՝ որպես պատգամավորներ, ունեն գաղտնի տեղեկատվությանը ստանալու իրավունք։ Իրավունք ունեն նաև ծանոթանալու, թե ինչ աշխատանքներ են տարվում դիվանագիտական ճակատում և ի՞նչ իրավիճակ է այս պահին ռազմաճակատում:

«Եթե մեզնից պահանջում են միասնականություն, ինչը մենք բոլոր ձևերով ցուցաբերում ենք, մենք էլ փորձում ենք այդ միասնականության համար ձեռք բերել այնպիսի տեղեկատվություն, որպեսզի իրավիճակը ռեալ գնահատենք, և ավելի շատ համաձայնեցնենք մեր գործողություններն այդ իրավիճակին։

Ի՞նչ ռազմավարություն է մշակվել, ի՞նչ է անհրաժեշտ, որպեսզի մեր հաջողությունները լինեն ավելին, քան կան ռազմաճակատում և նման հարցեր»,- նշեց պագամավորը։

Աղբյուր` Փաստինֆո