Փաստ ինֆո

Ադրբեջանն իր հաջողության ամբողջ հույսը դրել է հրետանակոծության վրա։ «Փաստինֆո»-ի հետ զրույցում ասաց «Արաբո» ջոկատի հրամանատար Մանվել Եղիազարյանը, որն օրերս է վերադարձել առաջնագծից և պատրաստվում է նորից մեկնել։ Նրա կարծիքով՝ թշնամին հրետակոծություններով փորձում է ճակատը կտրել խորը թիկունքից, որ վերջինս չկարողանա ապահովել առաջնագծի պահանջներ և հենց այդ պատճառով ամբողջ ուժը դրել են հրետանու վրա։

«Օդը պաշտպանելը մեզ համար պարտադիր է, բայց օդից բացի կա նաև հրետանի, որն իրենք ավելի շատ ունեն՝ մեր համեմատ»,- նկատեց Եղիազարյանը, բայց նաեւ արձանագրեց, որ ի տարբերություն հակառակորդի ՝ մեր զինվորները շատ ավելի լավ են կռվում։ Ազատամարտիկի փոխանցմամբ՝ հրետանու դեմ պետք է իրականացվեն ինժեներական աշխատանքներ՝ ընդգծելով, որ դեռևս 2014թ բարձրաձայնել է, որ անհրաժեշտ է ամրացնել խրամատները, ամբողջ Արցախի տարածքում պետք է խրամատներ լինեն։

Մեր զրուցակցի տեղեկություններով՝ հայ զինծառայողների շրջանում վիրավորների 90 տոկոսը բեկորային է, ուստի, «պետք է հետևակը թաղել հողի մեջ»։

«Պետք է խրամատավորվել, հետևակի գլուխը ծածկել։ Ազերիներից կամ իսլամիստներից ոչ մեկը չի վախենում, ես ձեզ տղամարդավարի եմ ասում, բոլորին տեսել եմ, բոլորը երանի են տալիս, որ հանդիպենք ու սկսենք կռվելը՝ գնդացիրներով, ավտոմատներով»,- նշեց ազատամարտիկը՝ հավելելով, որ երբեմն տեղի ունեցող նահանջները միայն այդ պատճառով են տեղի ունենում։

Եղիազարյանն ընդգծեց՝ թող ոչ մեկը չկասկածի, հայ զինվորը, հայ տղամարդը մեկ մետր էլ չի նահանջելու։

«Գիտե՞ք հիմա նահանջ կա, ո՛չ, ստիպված են հետ քաշվել»,- ասաց նա՝ ընդգծելով, որ, եթե հնարավոր չէ ամբողջ ճակատով, ապա կարող են կտոր-կտոր օդը պաշտպանել և խրամատներն ամրացնել, այդ դեպքում որևէ վտանգ չկա, հակառակորդի բոլոր հարձակումները կկանգնեցվեն։

Ինչ վերաբերում է դիվերսիոն խմբերին, ապա Եղիազարյանը նշեց, որ շատ դեպքերում նրանց կատարած հարձակումները թույլ են լինում։

«Կարծում եմ՝ Ալիևը, որտեղ դրոշակ են դնում, մեծ գումարներ է տալիս, դրանք էլ ամեն ինչ անում են, որ գան, դրոշակ դնեն, նկարվեն, հետո չեն էլ պահում, ինչպես՝ Հադրութում չպահեցին, Ղուբաթլույում չեն պահում, Զանգելանում է թույլ։ Իրենք գումար են աշխատում ընդամենը, դրա համար էլ այդ դիվերսիոն խմբերով անհանգստացնում են հասարակությանը և դրոշակ դնելով գումար են վաստակում։ Կարծում եմ՝ դա է պատճառը, բայց այն, որ այդ դիվերսիոն խմբերն անհանգստություն են պատճառում հասարակությանը և զորքերին, դա փաստ է, բայց մի գեղեցիկ օր դրանց կամաց-կամաց ոչնչացնելու ենք, արդեն սկսել ենք ոչնչացնելը »,- նշեց Եղիազարյանը։

Ազատամարտիկը գտնում է, որ դիվերսիոն խմբերի կիրառման մարտավարությունը նաև հոգեբանական ազդեցությունն է, փորձում են կոտրել ոգին, խուճապի մատնել, սակայն դա իրենց չի հաջողվում և չի ել հաջողվի։

«Ես չգիտեմ, թե օրինակ, Շուշի մտնել ձգտող խմբին որքա՞ն գումար է խոստացել Ալիևը։ Այդ պատճառով էլ կազմակերպված չեն իրենց հարձակումները, պատառ-պատառ են, կես-կես, ավելին՝ անիմաստ»,- նշեց Եղիազարյանը։

Մեր զրուցակիցը հայտնեց, որ իրենց կողմից «զբաղեցված» տարածքները չեն ամրացվում հետևակի կողմից, իսկ, եթե հետևակը չի մտնում տարածք, դա չի համարվում գրավված, որքան էլ հրետակոծեն, հրթիռակոծեն։ Եղիազարյանը կարծում է, որ հակառակորդն ուզում է հրետանային կրակով դիմադրությունը կոտրել, այդ պատճառով էլ մեծ խմբեր չեն գցում, դիվերսիոն, ահաբեկչական խմբեր են մտցնում, որոնք էլ ոչնչացվում են մեր զինվորների կողմից. «Պետք է դիմակայել, կանգնեցնել հարձակումը»։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ տարբեր կասետային զինատեսակներով հրթիռակոծելով խաղաղ բնակավայրերը, քաղաքացիական ենթակառուցվածքները, հոսպիտալները։ Ռազմական գործողություններն արդեն 39-րդ օրն է, ինչ ընթանում են։

Հեղինակ՝ Իզաբել Սահակյան

Աղբյուր` Փաստինֆո