Փաստ ինֆո

Օպերայի և բալետի ազգային ակադեմիական թատրոնի բեմում անսովոր աժիոտաժ է։ Երաժիշտներից, երգչախմբի անդամներից մինչև ետնաբեմում աշխատողներն այսօր բեմում են, բայց ոչ թե բեմադրության, այլ հայ զինվորի համար քողարկիչ ցանցեր են պատրաստում։ Արդեն չորս օր է, ինչ թատրոնի բեմը վերապրոֆիլավորվել և իր հնարավորությունները ծառայեցնում է առաջնագծի ամրացմանը։ Օպերային թատրոնի մեներգիչ Վարսենիկ Ավանյանը «Փաստինֆո»-ի հետ զրույցում ասաց, որ առաջին օրը թատրոնի բեմը տեսնելիս տարօրինակ զգացողություններ ուներ.

«Տպավորություն էր սովետական հին ֆիլմում էի գտնվում։ Երբևիցե մեր բեմն այսպիսի գույներ չի ունեցել։ Միշտ սովոր ենք պայծառ և տոնական վիճակների։ Բայց ինչ արած։ Երբ Տավուշյան պատերազմից հետո սկսեցինք համերգաշարեր, դրանք կոչվեցին թիկունքը մշակույթ, կարծում եմ, որ այն, ինչ այսօր անում ենք, ամրացնում է թիկունքը, և նույնիսկ նման մանր աշխատանքով պետք է մեր զինվորների թիկունքը լինենք»,-նշեց Վարսենիկ Ավանյանը։

Որքան էլ թատրոնի անձնակազմի համար անսովոր է բեմն այսպիսին տեսնել, նրանք բոլորը մեծ ոգևորվածությամբ են մասնակցում աշխատանքներին, և պնդում են եթե բեմն այսպես կարող է ծառայել, թող ծառայի։

Օպերային թատրոնի հսկիչ Կարինե Մկրտչյանը նկատեց՝ գուցե սա փոքր աշխատանք է, բայց մեծ գործ է, որն անում են զինվորների համար. «Մենք այսօր շատ վատ վիճակում ենք։ Այս փոքր գործով մեզ հոգեպես լավ ենք զգում, հասկանում ենք՝ զինվորի հետ ենք»,-ասաց օպերային թատրոնի աշխատակիցը։

Օպերային թատրոնի բեմը լավագույն վայրերից է, որտեղ քողարկող ցանցեր պատրաստելու համար կան անհրաժեշտ բոլոր հնարավորությունները։ Այս օրերին թատրոնի մեծ անձնակազմն անհրաժեշտության դեպքում աշխատում է մինչ ուշ գիշեր։ Արդեն երեք քողարկող ցանց պատրաստել և հանձնել են, որից մեկի վրա գրեթե երկու օր են աշխատել։ Այժմ էլ աշխատակիցներն անհամբեր սպասում են անհրաժեշտ կտորներին, որ կարողանան աշխատանքը շարունակել։ Ամուր թիկունք ստեղծելու հետ մեկտեղ այստեղ չեն մոռանում նաև հետևել թատրոնի բնականոն գործունեությանը։

Օպերային թատրոնի գեղարվեստական ղեկավարի տեղակալ Մկրտիչ Բաբաջանյանը նշեց, որ նոր պրեմիերաներ պետք է լինեին և այժմ էլ դրանց վրա աշխատանքներ կատարվում են. «Զուգահեռ նաև այդ աշխատանքներն են արվում, որովհետև դա էլ է պարտադիր։ Բնական է` հաղթանակից հետո պետք է հաղթանակի հետ կապված ծրագրեր լինեն, որ կարողանանք ժողովրդին ուրախացնել։ Նոր ներկայացումներ պետք է լինեն և դրանց մասին նույնպես մտածում ենք»,-հավելեց Մկրտիչ Բաբաջանյանը։

Պատերազմ է և օպերային թատրոնի բեմը, մշակույթը ևս ծառայում է բանակի համար, արտիստները վստահ են՝ շուտով կվերադառնան մշակութային կյանքին, կլինեն նոր ներկայացումներ, պրեմիերաներ և դահլիճը կրկին լեփ-լեցուն կլինի, քանի որ՝ ՀԱՂԹԵԼՈՒ ԵՆՔ։

Աղբյուր` Փաստինֆո