Փաստ ինֆո

Թշնամին գտնվում է Շուշիից ընդամենը մի քանի կմ հեռավորության վրա՝ առավելագույնը 5 և թշնամու նպատակն ու գերնպատակն է գրավել Շուշին, տիրանալ Շուշիին,- քիչ առաջ հայտարարել է Արցախի նախագահ Արայիկ Հարությունյանը։

Շուշիից տարածված տեսաուղերձում ասվում է.

«Սիրելի հայրենակիցներ, ինչպես 1992 թվականին, երբ սկսվեց մեր հաղթարշավը Շուշիի ազատագրումից, այսօր էլ մեր հաղթարշավը պայմանավորված է Շուշիի պաշտպանությունից։ Թշնամին գտնվում է այստեղից ընդամենը մի քանի կմ հեռավորության վրա՝ առավելագույնը 5 և թշնամու նպատակն ու գերնպատակն է գրավել Շուշին, տիրանալ Շուշիին։ Ինչպես ասում են՝ ով տիրում է Շուշիին, տիրում է Արցախին։

Ուզում եմ, որ գիտակցենք այս պահը, գիտակցենք և ոչ միայն լոկ խոսքերով, այլ անմիջական մասնակցությամ մասնակցենք Շուշիի պաշտպանությանը։

Իմ կյանքում առաջին անգամ ես եղել եմ Շուշիում 1992 թվականի մայիսի 8-ին և առաջիններից եմ եղել, որ մտել եմ ՍԲ Ղազանչեցոց եկեղեցի, համբուրել խաչը։ Այսօր էլ համբուրել եմ խաչը, աղոթել եմ, մոմ եմ վառել հանուն մեր հաղթանակի։ Իրականում ես հավատում եմ, որ հաղթելու ենք, հավատում եմ, որ այս օրերը լինելու են բեկումնային։ Դրա համար մեզ պետք է միավորվել, կռվել, պատժել թշնամուն, բայց դրա համար ժամ առաջ պետք է հասնել Արցախ։

Իհարկե սա խուճապային ելույթ չէ, այլ հակառակը՝ կրկնում եմ առավել քան երբևէ հավատում եմ մեր հաղթանակին։  Օրերի ընթացքում պետք է բեկում մտցնենք ճակատում և պետք է պատժենք հակառակորդին հենց Շուշիի դարպասներում։ Եկեք միավորվենք և միասին կռվենք, ամենամեծ առաքելությունը կատարենք հանուն մեր հայրենիքի։ Հաղթանակը մերն է լինելու, համոզված եղեք, ես հավատում եմ հաղթանակին»։

 Թեմայի վերաբերյալ Արայիկ Հարությունյանը տեսաուղերձից բացի նաև  գրավոր դիմել էր մեր հայրենակիցներին, որը ներկայացնում ենք ստորև.

«Սիրելի՛ հայրենակիցներ

Այսօր՝ այս վճռորոշ պատմական պահին, երբ թուրք-ադրբեջանական ու ահաբեկչական հրոսակախմբերը իրենց ողջ ռազմական ռեսուրսներով հարձակվել են Արցախ աշխարհի վրա՝ նպատակ ունենալով հազարամյակներով իր բնօրրանում ապրող արցախահայությանը բնաջնջելու կամ վտարելու սեփական հայրենիքից, մենք կենաց-մահու կռիվ ենք տալիս՝ բոլոր առումներով անհավասար պայմաններում։

Այժմ նրանք սպառնում են մեր հայրենիքին ու գոյությանը ոչ միայն ողջ առաջնագծի երկայնքով, այլ նաև լրջագույն ռազմական ռեսուրս են ներդրել Շուշիի ուղղությամբ՝ նպատակ ունենալով ամեն գնով տիրել հայոց հպարտ բերդաքաղաքին:

Շուշին լոկ քաղաք չէ, այն հայ ժողովրդի սեփական բնօրրանում ապրելու վճռականության խորհրդանիշն է, հայ ժողովրդի հաղթանակների խորհրդանիշը։ Շուշին համայն հայության բաբախող սիրտն է:

Որպես Արցախի գերագույն գլխավոր հրամանատար՝ ևս մեկ անգամ կոչ եմ անում՝ միացե՛ք, միասին պաշտպանենք մեր Շուշին, մեր Արցախը, մեր ազգային արժանապատվությունը…»։ 

Աղբյուր` Փաստինֆո