Փաստ ինֆո

ԱԺ-ի ընդունած օրենքի փոփոխություններով մարտական գործողությունների հետևանքով զոհված, անհետ կորած կամ հաշմանդամություն ձեռք բերած անձանց վարկային պարտավորությունները կներվեն։ Փոփոխություններին է անդրադարձել ՀՀ ֆինանսների նախարարի տեղակալ Արման Պողոսյանը։ 

Փոխնախարարի խոսքով՝ օրենքով հնարավորություն է ստեղծվում, որպեսզի բանկերն ու վարկային կազմակերպություններն, առանց հարկային հետևանքներ կրելու, կարողանան ներել ռազմական գործողությունների հետևանքով զոհված, անհայտ կորած համարվող, կամ հաշմանդամություն ձեռք բերած անձանց և նրանց հետ առաջնահերթորեն փոխկապակցվածների՝ ամուսնու, համատեղ ապրող ծնողի և զավակի վարկային պարտավորությունները:

«Այս նախաձեռնությունը տարբերվում է նրանով, որ խոսքը ոչ միայն վերաբերում է տույժերին ու տուգանքներին, այլև վարկային պարտավորությանն առհասարակ, այսինքն՝ նաև վարկի մայր գումարին: Նպատակը շատ պարզ է. շահառու համարվող անձանց կամ նրանց հետ փոխկապակցված անձանց անմիջապես ազատել վարկային պարտավորություններից»,- նշեց Պողոսյանը:

Փոխնախարարը շեշտեց, որ կարգավորումը համապատասխան որոշում կայացնելու առաջարկ է բանկերի և վարկային կազմակերպությունների համար, բայց ոչ՝ պարտադրանք:

Պետությունը օրենքի ընդունմամբ բանկերի և վարկային կազմակերպությունների հետ կիսում է բեռը՝ առաջացած վարկը չստանալու կամ չմարելու հետևանքով, այսինքն՝ պետությունը հրաժարվում է իրեն հասանելիք հարկերից, բանկերն ու վարկային կազմակերպություններին էլ առաջարկում են հրաժարվել իրենց հասանելիք գումարից՝ այդպիսով բեռը բաշխելով ֆինանսական կառույցների և պետության միջև։

Բանկերն ու վարկային կազմակերպությունները պատրաստակամ են օգտվել այս գործիքի ընձեռած հնարավորություններից և առավելագույն մեծ ծավալով վարկային պարտավորություններ ներել։

Աղբյուր` Փաստինֆո