Փաստ ինֆո

Մոսկվայում շատ լավ հասկանում են գրոհայիններին Ղարաբաղ ուղարկելու հնարավոր հետեւանքները։ Արտաքին հետախուզության ծառայության ղեկավար Սերգեյ Նարիշկինը հայտարարել է, որ հակամարտության գոտի ակտիվորեն ներգրավվում են Մերձավոր Արեւելքում պատերազմող միջազգային ահաբեկչական կազմակերպություններից վարձկանները:

Ռուսաստանը Ադրբեջանի պաշտպանության նախարարությանը տվյալներ է տրամադրել Լեռնային Ղարաբաղում մարտերին սիրիացի գրոհայինների մասնակցության մասին, ՌԻԱ Նովոստի- ի փոխանցմամբ՝ հայտարարել է ՌԴ Պետդումայի ԱՊՀ հարցերով կոմիտեի առաջին փոխնախագահ Վիկտոր Վոդոլացկին:

Ավելի վաղ Ադրբեջանի նախագահ Իլհամ Ալիեւը հայտարարել էր, որ ոչ Մոսկվան, ոչ Փարիզը ապացույցներ չեն ներկայացրել Բաքվին՝ Ադրբեջանի զինված ուժերի կողմից Լեռնային Ղարաբաղում մարտերին սիրիացի գրոհայինների մասնակցության վերաբերյալ:

Վոդոլացկին հայտարարել է, որ եթե Սերգեյ Նարիշկինը որպես ՌԴ արտաքին հետախուզության ծառայության ղեկավար հայտարարել է, որ սիրիացի գրոհայինները արգելված ահաբեկչական կազմակերպություններից Թուրքիայի տարածքով անցել են Ղարաբաղ, ապա նա անհերքելի ապացույցներ ունի:

«Ելնելով դրանից, արտաքին հետախուզության ծառայության կամ հատուկ ծառայությունների աշխատանքի շրջանակներում, ես վստահ եմ, որ նման նյութերը ներկայացվել են Ադրբեջանի պաշտպանության նախարարությանը եւ հետախուզությանը, որպեսզի նրանք համոզվեն Նարիշկինի արտահայտությունների ճշտության մեջ: Ինչու Ադրբեջանի պաշտպանության նախարարությունը, պատասխանատուները չեն տեղեկացրել իրենց նախագահին, սա արդեն երկրորդ հարցն է։ Ես կարծում եմ, որ նման տվյալներ Ադրբեջանի պաշտպանության նախարարությունն ունի, և նրանք պարտավոր էին տեղեկացնել իրենց ղեկավարին», - ասել է Վոդոլացկին։

Խորհրդարանականի կարծիքով, եթե Ալիևն այդ մասին տեղեկացված չի եղել, ապա դրա պատասխանատուները «ոչ թե իրենց նախագահի կողմն են, այլ խաղում են մեզ համար անհասկանալի իրենց փակ խաղը»:

Աղբյուր` Փաստինֆո