Փաստ ինֆո

Թող բոլոր միջազգային կառույցների մոտ տպավորություն չստեղծվի, որ արցախցի կինը տնային տնտեսուհի է և կարողանում է միայն ժենգյալով հաց թխել։ Մենք մեր արժեքների կրողն ենք, մենք մեր պատմության կրողն ենք, յուրաքանչյուրիս ընտանիքն ունի իր պատմությունը, դարերով ցեղասպանվելու, էթնիկ զտումների պատմությունը, երբ ամեն անգամ, երբ Ադրբեջանին բռնակցվեց Արցախը՝ խորհրդային տարիներին, իրականացվում էր ցեղասպանություն։ Այս մասին հրավիրված ասուլիսին ասաց «Արցախի կանանց նախաձեռնող խմբի» անդամ, մասնագիտությամբ լրագրող Լիանա Ադամյանը։

Ադամյանը պատմեց, որ տարիներ առաջ գյուղերից մեկում տատիկի է հանդիպել, որը պատմել է իր պատմությունը և այսօր այդ գյուղը հարձակման է ենթարկվել։

«Պատմեց, որ իր ծնողները մասնակցել են Առաջին աշխարհամարտին, ամուսինը՝ Մեծ հայրենականին, որդին՝ Արցախյան ազատագրական պայքարին և այսօր, համոզված եմ, որ թոռը կանգնած է առաջնագծում։ Այդ տատիկը չկա և գուցե երանելի է, որ չի տեսնում սերունդներով կրկնվող ակս պատերազմը, մենք սերունդներով կոտորվում ենք, մեզ սերունդներով փորձում են վախեցնել, որ մենք լքենք մեր բակավայրերը, մեր տները, մեր եկեղեցիները, մեր գերեզմանները, այդպես չի լինելու։ Մենք չենք հանդուրժելու, որ կեղծ օրակարգ այս օրերին պարտադրվի և Թուրքիան ներխուժի բանակցային գործընթաց»,- ասաց Ադամյանը՝ ընդգծելով, որ Թուրքիային որպես հակամարտության կողմ չեն դիտարկում։

Նրա խոսքով՝ չեն հանդուրժելու, որ Թուրքիան մնա անպատիժ, պահանջում են աշխարհից, համապատասխան օղակներից, որ Թուրքիայի նկատմամբ կիրառվեն համապատասխան պատժամիջոցներ, սառեցվեն ՆԱՏՕ-ում Թուրքիայի մասնակցությունը։

«Ամեն օր, ամեն վայրկյան սերունդներ են ոչնչանում։ Մենք չենք լռելու, որովհետև Արցախի մայրը ժամանակ չունի այս պահին սգալու կորուստը՝ իր տունը, տեղի ավերվածությունը, դրա ժամանակն էլ ենք ունենալու»,- ասաց նա։

Աղբյուր` Փաստինֆո