Փաստ ինֆո

Մեր տղերքը կռիվ են տալիս ամեն թիզ հողի համար, մենք հաղթելու ենք, չկասկածեք,- այս մասին «Փաստինֆո»,-ի հետ զրույցում հայտնեց ազատամարտիկ, «Արաբո» ջոկատի հրամանատար Մանվել Եղիազարյանը:

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։
Համաձայն ՊՆ հաղորդագրությունների՝ հակառակորդը մշտապես առավել ակտիվ ռազմական գործողություններ է ձեռնարկում հատկապես շփման գծի հարավային ուղղությամբ՝ Ջաբրայիլի շրջանում:

Հիշեցնենք նաև, որ հակառակորդը հոկտեմբերի 10-ին դիվերսիոն-հետախուզական ներթափանցման փորձ էր ձեռնարկել Հադրութի ուղղությամբ, որը հայկական ՊԲ ստորաբաժանումների արդյունավետ գործողությունների արդյունքում չեզոքացվել է։

«Փաստինֆո»-ի հետ զրույցում ազատամարտիկ Մանվել Եղիազարյանը նշեց, որ հակառակորդի ակտիվությունը հատկապես Ջաբրայիլի շրջանում պայմանավորված է երեք գործոնով՝ այն սահմանակից է Իրանին, ուստի այս ուղղությամբ հայկական կողմը ակտիվ կրակի հնարավորություն չունի, Ջաբրայիլի շրջանում տեղանքը զինտեխնիկայի տեղաշարժի համար ավելի նպաստավոր է, այստեղ բնակչությունը քիչ է։

«Հակառակորդը հատկապես ակտիվ գործողություններ ձեռնարկել է Ջաբրայիլի ուղղությամբ, որպեսզի մենք ազատ տեղաշարժվելու հնարավորություն չունենանք, չկարողանանք հրթիռակոծել, քանի որ Իրանի սահմանը մոտ է, և մեր հրետանային կրակի համար խոչընդոտներ կան, բացի դա Ջաբրայիլի տարածքը համեմատաբար հարթ է, ուստի հակառակորդը իր զինտեխնիկան ավելի հեշտ է տեղաշարժում, և երրորդ կարևոր պատճառն այն է, որ Ջաբրայիլի շրջանում բնակչությունը քիչ է, ուստի հակառակորդը կարծում է, որ այդտեղ պաշտպանությունը թույլ կլինի, դրա համար հիմնական գործողությունները զարգանում են Ջաբրայիլի ուղղությամբ: Հադրութ ներթափանցած դիվերսիոն խումբն էլ, որ մեր տղերքը ջախջախեցին, Հադրութի ճակատը չեն ճեղքել, Ջաբրայիլի կողմից են ներթափանցել, բայց տղերքը հակահարձակմամբ կարգի բերեցին, երեկվա դրությամբ դիվերսիոն խումբը ոչնչացվեց»,-նշեց ազատամարտիկը։

Ազատամարտիկը նաև փաստեց, որ նման լայնամասշտաբ պատերազմներում տարածքային փոփոխությունները նորմալ են.

«Մի գյուղ կտանք, տասը ետ կվերցնենք, դա նորմալ է: Կարևորը առաջնագիծը վերահսկվում է, հակառակորդն էլ առաջվա թափը էլ չունի, արդեն խռխռում է»,-ասաց Մանվել Եղիազարյանը:

Աղբյուր` Փաստինֆո