Փաստ ինֆո

Պատերազմական իրավիճակում չեմ ուզում որևէ քննադատություն հնչեցնել, բայց մի բան հստակ է՝ ընդդիմադիր բժիշկները իրավիճակը վերահսկողությունից դուրս են թողել, առողջապահության նախարարություն էլ, ինչ թվեր ուզում նկարում է, արդյունքում ունենք այս վիճակը,- «Փաստինֆո»-ի զրույցում ասաց  բժիշկ, «Պարացելսուս» հասարակական կազմակերպության նախագահ Նունե Ներսիսյանը։

Դիտարկելով կորոնավիրուսով վարակակիրների թվի օրեցօր ավելացող տվյալները՝ կարող ենք նկատել, որ վերջին շրջանում համավարակը Հայաստանում կրկին մեծ տեմպերով աճում է:

ՀՀ ԱՆ հիվանդությունների վերահսկման և կանխարգելման ազգային կենտրոնի տվյալներով՝ հոկտեմբերի 6-ին ՀՀ-ում գրանցվել է  կորոնավիրուսի 406 դեպք, հոկտեմբերի 7-ին՝ 672 դեպք, իսկ արդեն այսօր գրանցվել է վարակի նոր 718 դեպք:

Մեր զրուցակցի դիտարկմամբ՝ կորոնավիրուսային աճի նման տեմպը պայմանավորված է առողջապահության նախարարության անգործությամբ, ինչն էլ անվերահսկելի է դարձրել իրավիճակը.

«Ես միշտ հետևել եմ այդ ամենին և քննադատել եմ առողջապահության նախարարությանը, որ անգործությամբ են զբաղված, ինչի հետևանքով կորոնավիրուսային իրավիճակը անվերահսկելի է: Միայն մի բան նկատենք, այն վայրերը, որտեղ մարդկային կուտակումները շատ են, որտեղ զինվորների հավաքատեղին է, զինվորներն են հավաքագրվում, կորոնավիրուսի դեպքերը քիչ են, սակայն դպրոցներում, պետական հիմնարկներում, որտեղ դիմակ են կրել, կորոնավիրուսի դեպքերը գնալով աճում են»,- նշեց Նունե Ներսիսյանը:

Մեր այն հարցին՝ պատերազմական իրավիճակով պայմանավորված՝ արդյոք կան համավարակի զինված ուժեր ներթափանցելու նախադրյալներ, զրուցակիցը նշեց.

«Հիմա այնպիսի իրավիճակ է, որը վերահսկել հնարավոր չէ, մեր տղաներն անգամ իրենց տան անդամներին չեն ասում են, գնում են ռազմաճակատ՝ իրենց ընկերների մոտ: Չեմ կարծում, որ առողջապահության նախարարությունը կկարողանա վերահսկել իրավիճակը և այդ քանակությամբ թեստավորումներ իրականացնել»,- նշեց Նունե Ներսիսյանը:

Մեր զրուցակիցը նաև շեշտեց, որ երկրում պատերազմական դրության ավարտից հետո, անպայման ուսումնասիրվելու են փաստերը և անդրադառնալու են այս խնդրին:

Աղբյուր` Փաստինֆո