Փաստ ինֆո

«Վրաց-ադրբեջանական սահմանի սահմանազատման գործընթացի ժամանակ օտարերկրյա պետությանը Վրաստանի տարածքները հանձնելու մասին» գործի շրջանակներում ձերբակալվել են ԱԳՆ եւ ՆԳՆ պաշտոնյաներ, ասվում է Վրաստանի գլխավոր դատախազության հայտարարության մեջ: Այս մասին գրում է Инфотека 24-ը:

Ըստ առկա տվյալների՝ ձերբակալվել են Վրաստանի արտաքին գործերի նախարարության հարեւան երկրների դեպարտամենտի Սահմանային հարաբերությունների ծառայության պետ Իվերի Մելաշվիլին, ինչպես նաեւ Վրաստանի ՆԳՆ սահմանապահ ոստիկանության ցամաքային սահմանի պահպանության դեպարտամենտի գլխավոր տեսուչ Նատալյա Իլիչեւան, որոնք սահմանազատման եւ դելիմիտացիայի հանձնաժողովի աշխատանքի ժամանակ մինչեւ 2007 թվականը որպես փորձագետներ ստեղծել են քարտեզների ալբոմներ:

«Քարտեզների ալբոմների մեջ մեղադրվողները պետական սահմանի անցկացման ժամանակ դիտավորյալ օգտագործել են այնպիսի քարտեզագրական նյութեր, որոնք պատմականորեն եւ իրավական առումով չեն հիմնվել մեր պետության իրական դիրքորոշման, իրեն պատկանող տարածքների հետ կապված եւ չեն արտացոլել այդ դիրքորոշումը», - ասված Է հայտարարության մեջ:

Դատախազ Ջարջի Ցիկլաուրիի խոսքով՝ երկու երկրների իշխանությունները 1994 թվականին պայմանավորվել են սահմանագծել սահմանը 1938 թվականին հրապարակված քարտեզի համաձայն, սակայն գործի մասնակիցները դիտավորյալ թաքցրել են այն եւ աշխատանքի ժամանակ առաջնորդվել 1970-1980 թվականներին տպագրված քարտեզներով:

«Փորձաքննությունը պարզել է, որ սահմանազատման ժամանակ մեղադրյալները առաջնորդվել են 1970-1980 թվականներին հրատարակված քարտեզներով, ինչը էապես հակասում է մեր երկրի պատմական սահմանին», — ասել է Ցիկլաուրին:

Նա հստակեցրել է, որ խոսքը հանձնաժողովի աշխատանքի մասին է, որը կատարվել է 1996-2007թթ.:

Նշվում է, որ մեղադրյալներին սպառնում է 10-ից 15 տարվա ազատազրկում «Վրաստանի դեմ գործողությունների համար, որոնք ուղղված են օտարերկրյա պետությանը Վրաստանի ամբողջ տարածքի կամ դրա մի մասի հանձնմանը կամ Վրաստանի տարածքից՝ դրա մի մասի անջատմանը»:

Հանձնաժողովի առանձին փորձագետների հանցավոր գործողությունների արդյունքում առաջացել է պատմականորեն Վրաստանին պատկանող 3500 հա-ի կորստի վտանգ։

Աղբյուր` Փաստինֆո