Փաստ ինֆո

ԲՈւՀ ուսանողները կամավորական ջոկատներ են կազմում և ինքնակամ մեկնում դիրքեր, որտեղ այս օրերին մարտեր են ընթանում։ Համալսարանների ուսանողական կառույցները նաև հավաքագրում են առաջին անհրաժեշտության իրեր,սնունդ, դեղորայք, հագուստ և ուղարկում Արցախ՝ աջակցելու մեր զինծառայողներին և հրետակոծությունից պատսպարված բնակիչներին։

Նրանք նախապես ճշտել են, թե այս պահին ինչի կարիք կա Արցախում և իրենց միջոցներով, ինչպես նաև դասախոսների աջակցությամբ գնել են անհրաժեշտ իրերը։
«Բացի նյութական աջակցությունից, այս պահին ԵՊԲՀ ուսանողները ներգրավված են տարբեր բժշկական հաստատություններում վիրավորված զինծառայողներին և քաղաքացիներին անհրաժեշտ բուժօգնություն տրամադրելու գործում» ,- նշեց ՈՒԽ անդամը։

«Երեք օր առաջ դեռևս սկսել ենք հավաքագրել առաջին անհրաժեշտության ապրանքներ, սնունդ, դեղորայք, հագուստներ, ջուր, պարենային մթերքներ։ Մեր ուսանողները դրանք տեսակավորեցին, փաթեթավորեցին, ու արդեն քանի օր է ուղարկում ենք և շարունակելու ենք ուղարկել սահման»,- մեզ հետ զրույցում պատմեց Պոլիտեխնիկական համալսարանի ուսանողական խորհրդի նախագահը։

Հայաստանի պետական տնտեսագիտական համալսարանի ուսանողական խորհուրդը նույնպես ակտիվորեն մասնակցում է այս ողջ գործընթացին ու «Փաստինֆո»-ին փոխանցեցին, որ առաջին իսկ օրից հավաքել են անհրաժեշտ ամեն բան :

«Կամավորների մեծ խումբ ունենք արդեն մեկնած, մյուսներն էլ մեծ ոգևորությամբ սպասում են իրենց հերթին : Անգամ կան ուսանողներ, որ առողջական խնդիրներ ունեն, բայց ցանկություն են հայտնել մեկնել՝ անհրաժեշտության դեպքում այլ աշխատանքներ կատարելու համար»,- նշեցին ՈւԽ անդամները:

Աղբյուր` Փաստինֆո