Փաստ ինֆո

«ՀԱՊԿ-ին այս պահին չդիմելու որոշումը, կարծում եմ, պայմանավորված է այն համգամանքով, որ դեռևս մարտահրավերների և գրոհի լրջության և խորության հաշվարկ է տեղի ունենում, նաև համապատասխան ուժերի վերահաշվարկ է գնում։ Այս ամենը հաշվի առնելով, պետք է ասեմ, որ սա շատ լավ լուր է, երբ Հայաստանի իշխանությունները հաստատում են, որ դեռևս նման օգնության կարիք չկա։ Սա խոսում է նաև այն մասին, որ մարտական խնդիրներն, այս պահի դրությամբ նորմալ կատարվում են։ Լավ կլիներ և տա Աստված, որ այդպես էլ շարունակվի և մենք կարողանանք մեր սեփական ուժերով լուծենք մեր առջև ծառացած այս խնդիրը,- ասում է քաղաքագետ Հրանտ Մելիք- Շահնազարյանը, «Փաստինֆո»-ի հետ զրույցում վերլուծելով սահմանին թշնամու կողմից հրահրած հերթական ռազմական սադրանքի հետանքները ։ 

Անդրադառնալով վարչապետի այն հայտարարությանը, թե այս պահին Հայաստանը չի քննարկում ղարաբաղյան հակամարտության գոտում միջազգային խաղապահներ մտցնելու հնարավորությունը, քաղաքագետը նկատում է՝սա պայմանավորված է նրանով, որ օֆիցիալ կերպով այս պահին սահմանին լարված ռազմական գործողություններ են կատարվում և խաղաղության մասին խոսելը դեռևս վաղ է.«Իսկ եթե, ընդհանուր առմամբ մոտենանք այս հարցին, ապա խաղաղապահների այս տարածաշրջան բերելը երբեք չի բխել Հայաստանի Հանրապետության կամ Արցախի շահերից։ Մեզ ավելի պետք է այդ երկրների կողմից դրսևորվող դիվանագիտական աջակցությունը՝ հակառակորդի ագրեսիան զսպելու համար»։

Հարցին՝ ինչպե՞ս է քաղաքագետը գնահատում այս պահին Հայաստանի Հանրապետության կողմից տարվող դիվանագիտական աշխատանքները, վերջինս պատասխանում է՝ այն փաստը, որ մինչ այս պահն ադրբեջանական կողմի ագրեսիան զսպելու ուղղությամբ ոչ մի լուրջ աշխատանք չի կատարվել, սա խոսում է այն մասին, որ մեր դիվանագիտական խողովակները լուրջ խնդիրներ ունեն։

Անդրադառնալով Մակրոնի կողմից այսօր արված այն հայտարարությանը, թե ինքը պատրաստվում է իրավիճակով պայմանավորված հեռախոսակապեր ունենալ Ռուսաստանի Դաշնության ԱՄՆ-ի ղեկավարների հետ, Հրանտ Մելիք-Շահնազարյանը պատասխանում է. «Այս պահին ես տեղյակ չեմ, թե ինչ օրակարգ է քննարկվելու եռակողմ այդ զրույցի ընթացքում, բայց կարծում եմ, որ պատերազմը կանխելուն միտված ցանկացած նախաձեռնություն այս պահին պետք է ողջույնով ընդունել։ Վստահ եմ՝ Ֆրանսիան այն երկիրն է, որը կարող է հաջողությամբ նման նախաձեռնություն իրականացնող կողմ լինել»։

Խոսելով ռուսական կողմի այս պահին որդեգրած դիրքորոշման մասին, Հրանտ Մելիք- Շահնազարյանը նկատում է՝ Ռուսաստանի Դաշնությունն ակնհայտ կերպով սպասողական դիրքորոշում է որդեգրել, թեև մի քիչ անհասկանալի է, թե ինչի՞ն է նա սպասում տվյալ պարագայում. «Արդեն վաղուց գաղտնիք չէ, որ այս տարածաշրջանում ծագած էսկալացիան լուրջ մակարդակի սպառնալիքներ կարող է պարունակել նաև Ռուսատանի Դաշնության համար։ Ես նկատի ունեմ վերջին օրերին ղարաբաղա- ադրբեջանական շփման գծում և Հայաստանի Հանրապետության պետական սահմանին Թուրքիայի դրսևորած ռազմատենչ պահվածքը»,- ասում է քաղաքագետը։

Աղբյուր` Փաստինֆո