Փաստ ինֆո

Նույնիսկ մեկնաբանելու հարկ չկա, որ Թուրքիայի լկտի պահվածքը պայմանավորված է պանթուրքիզմի գաղափարի իրականացման մոլուցքով։ Սա կրկին անգամ մատնում է Թուրքիայի ագրեսոր, նվաճողական քաղաքականության ողջ էությունը։ Սա թուրքական կողմի արմենոցիդ դրսևորումներից հերթականն է» - «Փաստինֆո»-ի հետ զրույցում ասել է արտակարգ և լիազոր դեսպան Արման Նավասարդյանը՝ նշելով, որ Հայաստանը «շլակ բոուն»-ի դեր է կատարում՝ Թուրքիայի երազանքի իրականացման ճանապարհին, այն է՝ Պանթուրքիզմի իրականացմանը։

«Այլ կերպ ասած, պանթուրքիզմի իրականացմանն այս պահին միայն և միայն Հայաստանն է խանգարում Թուրքիային»,- ասել է դիվանագետը՝ անդրադառնալով Թուրքիայի անթաքույց մասնակցությանը Արցախի դեմ Ադրբեջանի ռազմական ագրեսիային։ Դիվանագետի դիտարկմամբ՝ Թուրքիայի այսօրինակ ագրեսիվ վարքը միայն մեր երկրի նկատմամաբ չէ դրսևորվում։ Այս պետությունը մի քանի ուղղություններով փորձում է իրականացնել պանթուքիզմի իր քաղաքականությունը, այդ թվում՝ Սիրիան, Լիբիան, Եգիպտոսը, Միջերկրակած ծովը, որտեղ նա ցանկանում է զավթել բոլորովին օտար երկրի ընդերքի հարստությունը և ահա Կովկասը հիմա մտել է այդ ցուցակի մեջ։ Թեև հենց այս տարածաշրջանում Թուրքիան կոնկրետ խնդիրներ ունի Հայաստանի հետ՝ դա 1915 թվականի արյունոտ հետքն է, որը, ըստ էության, Հայաստանը և հայերին լիկվիդացնելու քաղաքական կուրսն էր։ Պետք է միշտ հիշենք, որ այս նպատակը մշտապես առկա է եղել թրքական քաղաքականության հիմքում, պարզապես խորհրդային միության սառը պատերազմի տարիներին նա դա անել չէր կարողանում»։

Վերլուծելով երեկ Թուրքիայի նախագահ Ռեջեբ Թայիբ Էրդողանի կողմից արված հայտարարությանն այն մասին, թե ժամանակն է վերջ դնել՝ «Հայաստանի կողմից Ադրբեջանի տարածքների զավթմանը»՝ Արման Նավասարդյանը նկատում է.

«Ուզում եմ ձեզ մի դեպք պատմել՝ նեօօսմանիզմի ռեանիմացիայի գործում կարևոր դերակատարություն ունեցած Թուրքիայի նախկին արտգործնախարար Ահմեթ Դավութօղլու և Քլինթոնի հետ զրույցից։ Հանդիպումներից մեկի ժամանակ Դավութօղլին ասում է՝ տվեք ինձ մի կարգին, որպեսզի ես 1000 կմ շառավղով տրամագիծ գծեմ։ Նայեք, թե քանի՞ պետություն է հայտնվում այս շրջանակի մեջ։ Քլինթոնը նրան պատասխանում է՝ 22 պետություն։ Այնուհետև Դավութօղլին 3000 կմ շառավղով շրջանակ է գծում և հարցնում Քլինթոնին՝ թե քանի՞ պետություն է հայտնվում այս շրջանակի մեջ։ Այս անգամ նրան պատասխանում են՝ 70 պետություն։ Ահա Դավութօղլին հայտարարում է, որ Թուրքիան բոլոր 70 պետությունների հետ հարցեր ունի լուծելու։ Թե ի՞նչ հարցեր են դրանք, մենք արդեն իսկ տեսնում ենք այսօր՝ մեր օրերում, երբ նա մի քանի ուղղություններով ռազմական ագրեսիա է իրականացնում իր հարևանությամբ գտնվող պետությունների նկատմամբ՝ հասնելու համար իր դարավոր երազանքին՝ Պանթուրքիզի կառուցմանը»։

Հարցին՝ ի՞նչը կարող է զսպաշապիկ հանդիսանալ Թուրքիայի՝ Հայաստանի Հանրապետության նկատմամբ դրսևորվող այսօրինակ ագրեսիայի համար, Արման Նավասարդյանը պատասխանում է՝ միայն Ռուսաստանի Դաշնությունը կարող է սանձել Թուրքիայի այսօրվա դրսևորած քաղաքական խուլիգանությունը, երբ, նա իր վարձկաններին Ադրբեջան ուղարկելով, փորձում է իր փայփայած երազանքին հասնել Ադրբեջանի ձեռքերով.

«Եթե Թուրքիան գնա այդ քայլին և հարձակվի Հայաստանի Հանրապետության պետական սահմանների վրա, ապա այս դեպքում Ռուսաստանի Դաշնությունն անպայմանորեն կմտնի խաղի մեջ, որովհետև Թուրքիային զսպող միակ ռեալ օղակը Ռուսաստանի Դաշնությունն է։ Բացի այդ, Թուրքիայի կողմից Հայաստանի պետական սահմանների նկատմամբ ռազմական գործողությունների սանձազերծումը մեծ պայթյունի դեր կկատարի տարածաշրջանում, վերածվելով ընդհուպ մինչև երրորդ համաշխարհային պատերազմի»։

Արման Նավասարդյանն, այնուամենայնիվ կարծում է, թե Թուրքիան այս փուլում Հայաստանի Հանրապետության դեմ ռազմական ոտնձգությունների չի գնա, իսկ այս ամենն արվում է Ռուսաստանի Դաշնության հետ մանրախնդիր տարբեր տիպի հարցեր սակարկելու համար, կապված Սիրիայի, Լիբիայի և այլ խնդիրների հետ.«Այնպես որ, Թուրքիային զսպող միակ օղակը եղել և մնում է Ռուսաստանի Դաշնությունը։ Եթե դուք կարծում եք, թե Ամերիկան երբևէ այդ քայլին կգնա, սխալվում եք։ Այդպիսի բան չի լինի։ Այստեղ ուզում եմ ձեզ հիշեցնել 1918 թվականի Բրիտանական կայսրության տարածած հայտարարությունն այն մասին, որ բրիտանական նավերը չեն կարող բարձրանալ Արարատի կատար...

Այնպես որ, ոչ ոք երբեք չի գա ու նեցուկ չի կանգնի մեզ։ Իսկ Ռուսաստանի Դաշնությունը ստիպված է անել դա, որովհետև այն բխում է նաև իր պետական շահերից՝ կորցրեց Հայաստանը՝ կկորցնի նաև Ռուսաստանը։ Եվրոպական կամ ամերիկյան երկրներն այս տարածաշրջանում կորցնելու ոչինչ չունեն։ Բացի այդ, Ռուսաստանը շատ ավելի հզոր ռազմական հնարավորություններ ունի, քան նույնիսկ Թուրքիան»։

Հեղինակ՝ Նվարդ Մանվելյան

Աղբյուր` Փաստինֆո