Փաստ ինֆո

ՄԱԿ-ը և ԵԱՀԿ Մինսկի խմբի համանախագահող երկրները պարտավոր են դրսևորել անաչառություն և հստակ դիրքորոշում արտահայտել՝ կանխելու աշխարհում բռնությունների և մարդու իրավունքների կոպտագույն ոտնահարումների նոր դրսևորումները։ ՀՅԴ երիտասարդական թևի ներկայացուցիչները «Ադրբեջան՝ ագրեսոր» վանկարկումներով այսօր քայլերթ են իրականացրել դեպի ՄԱԿ-ի Հայաստանյան գրասենյակ՝ դիմում-նամակ ներկայացնելու։

Երիտասարդները բարձրաձայնել են Ադրբեջանի և Թուրքիայի կողմից իրականացվող ագրեսիվ գործողությունները՝ փորձելով միջազգային կառույցի ուշադրությունը սևեռել ստեղծված իրավիճակին, մասնավորապես, նրանց ՄԱԿ-ի ԱԽ արտահերթ նիստին քննարկման առարկա դարձնելու համար։ Նրանք նշել են, որ, հաշվի չառնելով հրադադարը և կորոնավիրուսի պանդեմիայի ընթացքում համընդհանուր հրադադար հաստատելու ՄԱԿ-ի քարտուղարության կոչը, Ադրբեջանը ռազմական գործողություններ է սկսել ինչպես Արցախի և Արցախի քաղաքացիական բնակիչների թիրախավորել, ինչպես նաև՝ թիրախավորել են Վարդենիսի խաղաղ բնակչությանը։ Բացի դա՝ ՀՅԴ երիտասարդներն արձանագրել են նաև Թուրքիայի ներգրավվածության աննախադեպ աստիճանը, որը, իրենց պնդմամբ, լկտիաբար հայտարարել է Ադրբեջանին իր լայնամասշտաբ օգնության մասին։

«Թուրքիան ունենալով մարդու իրավունքների խախտումների երկար պատմության փորձ, ինչպես օրինակ՝ Հայոց ցեղասպանությունը, բռնությունները քրդերի դեմ, ռազմական ներխուժումները Սիրիա և Լիբիա, Հունաստանի և Կիպրոսի դեմ եղած սադրանքները, շարունակում է վարել ռազմատենչ քաղաքականություն։ Հարկ ենք համարում ընդգծել, որ Արցախի վրա հերթական հարձակումից և քաղաքացիական բնակչությանը թիրախավորելուց առաջ Ադրբեջանի ղեկավարը հայտարարել է, որ հրաժարվում են բանակցությունից»,-հայտարարեց ակցիայի մասնակիցներից մեկը՝ հրապարակելով կառույցին ուղղված նամակի բովանդակությունը։ Բացի դա՝ երիտասարդները կոչ են արել ՄԱԿ-ին և ԵԱՀԿ Մինսկի համանախագահող երկրներին՝ վերջ տալ ռազմատենչ Ադրբեջանի և Արցախում ապրողների կյանքի իրավունքները պաշտպանող հայկական կողմի միջև հավասարության նշան դնելուն և իրերն իրենց անունով կոչելը և միանշանակ գնահատականներ հնչեցնելը ռազմատենչ բռնատիրական ռեժիմի ներկայացուցիչներին ¨ նրա տարածաշրջանը ապակայունացնող գործընկերոջ՝ Թուրքիային զսպող մեխանիզմներից մեկն է, ինչը սակայն իրականություն չի դառնում՝ այդպիսով ամեն անգամ հետ չի պահում Ադրբեջանին կոպտորեն խախտել միջազգային իրավունքի նորմերը։

Երիտասարդները կոչ արեցին՝ խստորեն դատապարտել Թուրքիայի ագրեսիվ դիրքորոշումը և իր շարունակական անխոհեմ քայլերը, որոնք նպաստում են տարածաշրջանի ապակայունացմանը։ Պահանջում են ԱԽ արտահերթ նիստում հստակ գնահատական տալ և դատապարտել Ադրբեջանի կողմից՝ մարդու իրավունքների և եռակողմ զինադադարի կոպտագույն խախտման հերթական այս դեպքին, որը հանգեցրել է տարածաշրջանում լարվածության աճին և կողմերի միջև ռազմական բախումների վերսկսմանը։

«Խաղաղ կարգավորման բանակցություններից Ադրբեջանի հրաժարվելը և պատերազմական գործողությունների նախաձեռնելը թողնում են հիմնահարցի կարգավորման մեկ ճանապարհ՝ ճանաչել Արցախի ժողովրդի ինքնորոշման իրավունքի իրացման փաստերը և ԱՀ անկախությունը»,- հայտարարեց ՀՅԴ երիտասարդական թևի ներկայացուցիչը։

Աղբյուր` Փաստինֆո