Փաստ ինֆո

Առավոտյան մենք հաջողություններ ենք գրանցել Ասկերան-Մարտունի հատման հատվածում։ Հակառակորդը տվել է մարդկային, տեխնիկայի կորուստներ։ Այս մասին այսօր լրագրողների հետ զրույցում ասաց ԱԺ անվտանգության և պաշտպանության հարցերի մշտական հանձնաժողովի նախագահ Անդրանիկ Քոչարյանը։

«Մենք հաջողություններ ենք արձանագրել հարավային հատվածում Ջեբրայիլի ուղղությամբ, որտեղ ունեցել էինք դիրքային կորուստներ, բայց այս պահին դիրքային կորուստների խնդիրը չէ։ Այս պահին ճիշտ ռազմավարությունն իրականություն դարձնելն է, որը մենք տեսնում ենք ամեն օր։ Մենք տեսնում ենք համահայկական մեծ մոբիլիզացիա։ Դա իր մեջ ներառում է թե՛ սփյուռքը, թե՛ Հայաստանը»,-ասաց Անդրանիկ Քոչարյանը՝ հավելելով, որ հակառակորդը երբ այս ամենն անում էր, լավ չէր պատկերացնում, որ Հայաստանն ունի կերտած հաղթանակներ, որի հիշողությունը չի մարել. «Իրենք մեզ ստիպեցին բանակի կարողությունների ավելացման տեմպն ուժեղացնել, և արդեն երեկ իրականություն դարձավ որակյալ մոբիլիզացիան։

Դա այն է, որ երեկոյան ոչ միայն կամավոր, այլ նաև զինկոմիսարիատներ էին գալիս արդեն որոշակի բանակային մասնագիտություն ստացած, տարիներ շարունակ Արցախի Հանրապետությունում այն երիտասարդները, որոնք ոչ միայն ծանոթ են առաջնագծին, այլև ծանոթ են այսօրվա առաջնագծի պատասխանատու հրամանատարությանը։ Մենք ունեցանք շատ արագ ձևավորած կամավոր ռեզերվ, որն այսօր արդեն գտնվում է պաշտպանության բանակի տնօրինման և հրամանատարության տակ»,-նշեց Անդրանիկ Քոչարյանը՝ նկատելով, որ զինված ուժերը մարդկային ուժի խզում չունեցան, որովհետև միշտ եթե պատերազմն ունենալու է շարունակական բնույթ, նա պետք է անպայման սնուցվի և այդ սնուցողը պետք է հասարակությունը լինի։

Անդրանիկ Քոչարյանն ընդգծեց՝ Հայաստանի թե՛ իշխանությունը, թե՛ ընդդիմությունը երեկ ցուցաբերեցին անկեղծ մոտեցում հայրենիքին և նրա անվտանգությանը.

«Երեկ պատմական օր էր»։

Աղբյուր` Փաստինֆո