Փաստ ինֆո

Երբ որ պետք լինի, գործի կդնենք։ Այս մասին ասաց ԱԺ «Իմ քայլը» խմբակցության պատգամավոր Անդրանիկ Քոչարյանը՝ անդրադառնալով «Իսկանդեր»-ի օգտագործմանը։

«Դա թողեք զինվորական մասնագետներին, իսկ այս երկու օրվա ռազմական գործողությունների տրամաբանությունից չեք նկատում քաոսային, իրավիճակային որոշումներ։ Դուք տեսնում եք քայլերի տրամաբանություն։ 90-ականներից ես եղել եմ բանակի ակունքներում, եղել են գործողություններ, ծավալուն, եղել են վերելքներ, անկումներ մինչև 1994թ.-ի զինադադարը։ Այս անգամ Ադրբեջանը համոզված եմ Թուրքիայի հրահրմամբ օգտագործեց իր զինանոցի այս պահին գուցե 70 տոկոսը։

Արձանագրենք, որ կորուստները սկսած սպառազինության քանակական մասով, 30 տանկ, դա հանաք բան չէ, մեկ օրվա մեջ դա տանկային տեխնիկայի 10 տոկոսն է»,-ասաց Անդրանիկ Քոչարյանը։

Վերջինս նկատեց՝ այսօրվա մեր խնդիրն է նաև առիթը բաց չթողնել և հիշեցնել, որ զինադադարն ունեցել է 3 ստորագրություն։

Հարցին՝ ճանաչման հարցի անհրաժեշտությունը որքանով է տեսնում, Անդրանիկ Քոչարյանն ասաց. «Ճանաչումը միշտ կա, բայց, քանի որ գործողությունները գնում են մեզ համար այս պահին բարենպաստ հունով, ճանաչումը կարող էր մի քանի օր սպասել։ Դա կախված է նրանից, թե զարգացումները ռազմի դաշտում ինչպիսի ընթացք կունենան։

Կարծում եմ՝ ճանաչումն էլ օրակարգում կա, վարչապետը նշեց այդ մասին»,-ասաց Անդրանիկ Քոչարյանը։

Աղբյուր` Փաստինֆո