Փաստ ինֆո

Կարծում եմ՝ հիմա պահն է, որ քննարկենք, թե հենց հիմա ինչ ենք անելու, քան՝ քննարկենք, թե ինչ պետք է անեինք, որ սա չլիներ։ Այս մասին ԱԺ հատուկ նիստին ասել է «Լուսավոր Հայաստան» խմբակցության ղեկավար Էդմոն Մարուքյանը՝ դիմելով ՀՀ վարչապետ Նիկոլ Փաշինյանին։

Մարուքյանը նշեց, որ մինչ հիմա ԱՀ անկախությունը չենք ճանաչել բանակցությունների պատճառով և քննարկվում էր, որ ԱՀ անկախությունը ճանաչելու դեպքում բանակցությունները կտապալվեր, որից հետո լայնամասշտաբ կռիվ կսկսվի, հետո կհարձակվեն նաև ՀՀ-ի վրա և կներգրավվենք լայնածավալ պատերազմի մեջ։

«Հիմա չկան բանակցություններ, բանակցությունների մասին խոսելն անիմաստ է, լայնամասշտաբ պատերազմ է մեկնարկել։ Արդյո՞ք մեր օրակարգում կա ԱՀ անկախության ճանաչման հարցը՝ դրա շարունակական հետևանքներով, որից հետո նաև Արցախում կլինի հանրաքվե, Արցախը կմիանա ՀՀ-ին և այս թեման կփակենք հավիտյանս։ Այսինքն՝ կա մեծ պատերազմ, այլևս անիմաստ է»,- ասաց Մարուքյանը՝ հետաքրքրվելով վարչապետից, թե արդյոք կա նման հարց օրակարգում։

Վարչապետ Նիկոլ Փաշինյանն էլ նշեց, որ օրակարգում կա նման հարց, իսկ թե գնում են նման քայլի, թե՝ ոչ, Փաշինյանն ասաց, որ այդ հարցը պետք է լրջորեն քննարկել և գուցե սկսվի նաև հանրային քննարկում։

«Մենք քննարկում ենք իրադարձությունների զարգացման բոլոր սցենարները»,,- նշեց վարչապետը։

Մարուքյանն էլ արձագանքեց՝ հիշեցնելով, որ Ապրիլյան պատերազմի ժամանակ օրակարգ եկավ Հայաստան-Արցախ ռազմաքաղաքական դաշինքի գաղափարը, որն այդպես էլ չի արվել և զինանոցում մնացել է Արցախի ճանաչման հարցը։

«Հիմա՝ մենք կորցնելու ինչ ունեինք, այսինքն՝ մեծ պատերազմի իմաստով, դրա մեջ ենք։ Հիմա պատերազմ է և այո, ես կոչ եմ անում Հայաստանում սկսել քննարկումներ՝ Արցախի ճանաչման հարցի և դրա հետագա խնդրի լուծման առումով»,- ասաց Մարուքյանը։

Աղբյուր` Փաստինֆո