Փաստ ինֆո

«Շենքի կառուցման պատճառով , ամեն հարվածից մեր տները դղրդում են, հիմքերը թուլանում, մի օր քանդվելու է, հետո կասեն՝ վթարային էր, դրա համար էլ քանդվեց, ինչի՞ են մեր տները քանդում: Շինարարական աշխատանքների հետևանքով հիմքերն ավելի են թուլանում և քանդվելու վտանգի տակ են»,- լրագրողների հետ զրույցում իրենց բողոքն արտահայտեցին Աղբյուր Սերոբ 7 հասցեի բնակիչները: 

Նշենք, որ Աղբյուր Սերոբ փողոցի բնակիչները վաղ առավոտից ակցիա են իրականացնում ՝ պահանջելով չեղարկել իրենց շենքերի հարակից տարածքում կառուցվող բարձրահարկ շենքի կառուցման մասին որոշումը, որը, բնակիչների խոսքով, կառուցվել է տարածքում գործող մանկապարտեզի օտարման և սեփականաշնորհման հաշվին։ Քաղաքացիները մեքենաներով փակել էին դեպի շինհրապարակ տանող ճանապարհը՝ չթույլատրելով շինտեխնիկայի մուտքը:

Բնակիչները նշում են, որ դիմել են բոլոր համապատասխան կառույցներին, սակայն ոչ մի պատասխան չեն ստացել։

«Ուղիղ 5 ամիս, որտեղ ասես դիմել ենք՝ քաղաքապետարան, նախագահին, վարչապետին, բողոքել ենք, իրենք էլ հազար թղթեր են ուզել, բայց ոչ մի հստակ պատասխան չկա։ Վարչապետը խոստացել է ուսումնասիրել խնդիրը, լուծում տալ, դեռ սպասում ենք»։

«ԱԻՆ ենք դիմել, ասել ենք՝ պատշգամբները վթարային են, ասել են՝ հենց փլվի, կզանգենք՝ կգանք, կբարձրացնենք»,-դժգոհեց բնակիչներից մեկը:

Նրանք պնդում են , որ նոր կառուցվող շենքի փոխարեն՝ կարելի է կանաչապատ տարածք կառուցել, որտեղ երեխաները կկարողանան խաղալ:

«Այս տարածքում ինչ կա գնեցին ու նոր բան կառուցեցին, տեղ չկա երեխաները խաղան, իրենց համար մենակ՝ փող-փող: Արդեն երկու ամիս է շրջակա շենքերը ցնցվում են, ամբողջ կահույքը շարժվում է, տները փոշի է լցվում, երեխեքը այս փոշին շնչում են»,- նշում են բնակիչները՝ դժգոհելով, որ շինարարական աշխատանքների հետևանքով զրկված են աշխատելու և հանգստանալու հնարավորությունից:

Բնակիչներից մեկն էլ վստահեցրեց, որ շենքը կառուցվում է օրինախախտումներով։ Ակցիայի մասնակիցների խոսքով՝ շենքի կառուցման որոշում տվել է քաղաքապետը , ուստի պահանջում էին , որ Հայկ Մարությանն էլ հիմնավորի՝ մանկապարտեզը քանդելու և շենք կառուցելու իր որոշումը։

«Պատճառաբանում են, թե մանկապարտեզը վթարային է, չկա նման բան: Թող հստակ հիմնավորեն՝ ինչո՞վ է պայմանավորված նման անօրինական որոշումը,-բողոքում էին Աղբյուր Սերոբ 7 հասցեի բնակիչները:

Աղբյուր` Փաստինֆո