Փաստ ինֆո

Փաշինյանին ու թիմակիցներին դեռ 2008-ից է ծանոթ «Հիմա» կարգախոսը, որի տրամաբանությամբ իրենք այսօր գործում են: Փաշինյանն ու իր թիմն իրենց բոլոր ցանկությունների ու նպատակների իրականացման հարցում շատ պրագմատիկ են և «հիմա»-ն նրանք միս ու արյուն են դարձնում հենց հիմա: Որպես արդյունք՝ նրանք բոլորն արդեն հասցրել են նոր բնակարաններ ձեռք բերել՝ բարելավելով իրենց կենցաղը, նոր, թանկ ավտոմեքենաներ ունենալ, արդեն անցել են ամառանոցներին, սեփական բիզնեսներ ունենալուն, վարկերով շինարարություն ծավալելուն: Փոխարենը՝ հասարակությանը կերակրում են պատրանքներով՝ սին խոստումներով, մինչև 2050 թվականը խոստանալով երջանիկ ապագա, որի մասին գոռում էր Փաշինյանն իր հեղափոխության արշալույսին՝ խոստանալով երջանիկ կյանք և արժանապատիվ ապագա: Դա մոտավորապես Եհովայի վկաներին՝ իրենց գուրուների խոստացած բացարձակ երջանիկ կյանքն է, որով մեր ժողովրդին կերակրելը, պրիմիտիվիզմ է: Բայց եկեք տեսեք, որ արդեն երկուսուկես տարի սուտ հարկեր ու տուգանքներ մոգոնելով, արտակարգ դրության կամ կարանտինի ժամկետներ ձգելով Փաշինյանն իր և իր թիմի մինիմում ցանկություններն իրականացրել, արդեն անցել է մաքսիմումին: ԸՆդհանրապես, նրան և իր թիմին հատուկ է իրենց գործած բոլոր սխալներն այլոց վերագրելու քաղաքականությունը: Եթե իրենք ապաշնորհ են /իսկ որ այդպիսին են, վկայում են բոլոր ոլորտներում հետընթացի ցուցանիշները/, ապա մեղավոր են նախկինները, եթե մարդիկ անաշխատ են մնացել, մեղավորն հենց իրենք են, այլ ոչ թե՝ փաշինյանական թիմի վատ կառավարումը:

Իրականում՝ մենք գործ ունենք մի խումբ մարդկանց կողմից ժողովրդին խաբելու ճանապարհով իշխանությունը զավթելու փաստի հետ, որը հնարավոր և անհնար բոլոր մեթոդներով երկարաձգելու խնդիր է հիմա լուծում Նիկոլ Փաշինյանը՝ ընդհուպ արդարացնելով իրենց գործած բոլոր սխալները, այն մտայնությամբ, թե՝ նա, ով չի սխալվում առաջ չի ընթանում: Եղբայր, բայց ձեր գործած սխալները ավերի ու երկրաշարժի են նմանում, դրանք առաջընթացի որևէ հույս անգամ չեն թողնում, ինչի՞ մասին է խոսքը: Մանավանդ, բոլորովին չենք տեսնում, որ ինքներդ փորձ անեք ուղղելու ձեր գործած սխալները:

Վերջերս Նիկոլ Փաշինյանը՝ կուսակիցներին ուղղված խոսքի հանրայնացմամբ իր ֆբ էջում, փաստեց, որ այն ոչ միայն քպական նեղ շրջանակի համար էր: Որպես իշխանություն իր և իր թիմի սխալները «լեգիտիմացնելու» մոտիվացիան, հաստատում էր մեկ բան, այն, որ ինքը շարունակում է լինել և մնալ «Քաղաքացիական պայմանագիր» կուսակցության առաջնորդը, այլ ոչ թե՝ կառավարության ղեկավար, երկրի վարչապետ:

Ինչ է նշանակում՝ «ՔՊ-ն պետք է շարունակի «հետեւողական սխալների այն ճանապարհը», որ սկսել է 2014 թվականին եւ նույնիսկ դրանից առաջ: Մենք պետք է հրաժարվենք «սիրված լինելու» կոմֆորտ զոնայում գտնվելու մեր ձգտումներից, որովհետեւ մենք իշխանության չենք եկել այստեղ մնալու համար, մենք իշխանության եկել ենք մեր ժողովրդի, մեր պետության համար մտածողության նոր հարթություն ձեւավորելու եւ Հայաստանը այդ նոր հարթություն բարձրացնելու նպատակով: Եւ մենք անելու ենք դա՝ շարունակելով հետեւողական սխալների մեր ռազմավարությունը»:

Իրականում նա փորձի և սխալի ճանապարհով գնալու և երրորդ հանրապետությունը երեք տասնյակ տարիներ անց փորձադաշտ դարձնելու մասին էր հռետորաբանում, ասելով, թե՝ գործե՛ք սխալներ, ես տեր եմ:

Այս կերպ Նիկոլ Փաշինյանը ոչ միայն արդարացնում է իր և իր թիմի անկարողությունը և տապալումները բազմաթիվ ոլորտներում, իր ղեկավարած քաղաքական ուժի՝ կադրային առումով բացարձակ սնանկ լինելը, այլև բաց տեքստով խոստովանում էր, որ կեղծիքի ու ստի ճանապարհով են իրենք եկել իշխանության:

Այսպիսով նա նաև փորձում է իր իսկ սխալների, իր թիմի ապաշնորհ կառավարման բարձրաձայնողն ու ընդդիմադիրը լինել՝ իր կարծիքով տեղ չթողնելով ընդդիմության համար՝ գիտակցելով ու հասկանալով, որ առաջիկայում հասարակության դժգոհության և բողոքի ալիքն ավելի ու ավելի է մեծանալու: Իսկ այդ համատեքստում ընդդիմադիր ուժերը հատ-հատ իր առջև են դնելու արտաքին և ներքին կյանքում գործած՝ իր բոլոր սխալները: Իսկ ինքը նախօրոք է ասում՝ միտումնավոր են գործված սխալները:

Իսկ որպես արդյունք՝ հանրությունն առաջիկայում քպական ,,օրենսդիրների,, ու ,,կառավարիչների,, առավել ցինիկ վարքաբանության ականատեսը կլինի, քանի որ իրենց Նիկոլն է ասել՝ անվարան սխալվեք, դա հանուն Հայաստանի է:

Դե, իսկ, այն մասին, թե իրենցից հետո եկողն ինչ տիտանական ջանքեր պիտի գործադրի քպականների գործած ավերը վերականգնելու համար, նրանց վեջն էլ չի լինի:
ՔՊ-ն առաջնորդվում է մեզանից հետո՝ թեկուզ ջրհեղեղ տրամաբանությամբ:

Հեղինակ՝ Մ. Մինասյան

Աղբյուր` Փաստինֆո