Փաստ ինֆո

Չեմ կարող ասել՝ ինչու չընտրվեց Երվանդ Խունդկարյանը։ Բավարար ձայներ չստացավ։ Այս մասին լրագրողների հետ զրույցում ասաց ՍԴ դատավոր Արևիկ Պետրոսյանը։
«Քվեարկությանը մասնակցություն ունեցել եմ։ Բազմաթիվ հարցեր եմ ուղղել թեկնածուին, թեկնածուն էլ տվել է իր պատասխանները»,-ասաց Արևիկ Պետրոսյանը։

Հարցին՝ ովքեր չեն մասնակցել քվեարկությանը, Արևիկ Պետրոսյանը ձեռնպահ մնաց մանրամասներ ներկայացնելուց։

Դիտարկմանը, որ կան դատավորներ, որոնք կարծում են՝ գործընթացն ուղղորդված է, Արևիկ Պետրոսյանն ասաց. «Յուրաքանչյուր դատավոր իր դիրքորոշումն ունի, արտահայտում է իր դիրքորոշումը, միգուցե ունի դրա վերաբերյալ նաև իր համապատասխան հիմնավորումները։ Գտնում եմ, որ այս գործընթացը, որը տեղի է ունեցել մանրամասն, այդ ընթացքում ոչ միայն հարցադրումների միջոցով անդրադարձ է կատարվել կոնկրետ թեկնածուին, թեկնածուին ներկայացվող պահանջներին, այլև ընդհանրապես ստեղծված իրավիճակին, սահմանադրաիրավական փոփոխություններին, օրենքի փոփոխություններին, ՍԴ-ում ճգնաժամ հասկացությանը, հանրային վստահությանը ՍԴ-ի նկատմամբ։ Եղել են տարբեր քննարկումներ»,-ասաց Արևիկ Պետրոսյանը։

Հարցին՝ քաղաքական հարցեր եղել են, Արևիկ Պետրոսյանն ասաց. «ՍԴ-ում քաղաքական հարցեր չեն քննարկվում։ Թե ինչպիսին են եղել հարցադրումները, մանրամասներ ներկայացնելու ցանկություն չունեմ։ Յուրաքանչյուր դատավոր, եթե ցանկություն կունենա, կարող է ներկայացնել։ Հարցադրումները քաղաքական են եղել, իրավական կամ այդ տիրույթի շրջանակում են եղել, թե ոչ, չեմ մանրամասնի»,-ասաց Արևիկ Պետրոսյանը։

Վերջինս հավելեց, որ բոլոր հարցադրումների վերաբերյալ Երվանդ Խունդկարյանն իր դիրքորոշումն արտահայտել է, սակայն չցանկացավ նշել՝ բավարարել են նրա պատասխաններն իրեն, թե ոչ։

Արևիկ Պետրոսյանն ընդգծեց, որ ինքը ՍԴ նախագահի պաշտոնի համար առաջադրումներ չի կատարելու։

Հարցին՝ իր կարծիքով ով լինի ՍԴ նախագահի հաջորդ թեկնածուն, Արևիկ Պետրոսյանն ասաց. «Չեմ կարող ասել, որովհետև պետք է լինեն առաջադրումներ և ինքնաառաջադրում։ Ոչ մեկին չեմ պատրաստվում առաջադրել»,-հավելեց Արևիկ Պետրոսյանը։

Աղբյուր` Փաստինֆո