Փաստ ինֆո

Հայաստանի վերափոխման ռազմավարության օրակարգը ներկայացնելով՝ ՀՀ վարչապետ Նիկոլ Փաշինյանը նշեց, որ 4 առանցքային արժեքներով պետք է առաջնորդվեն։

«Այդ արժեքներն են՝ հայոց պետականությունը, կրթությունը, անհատը, աշխատանքը։ Մենք այսօր պետք է մտածենք, թե ինչ են արձանագրելու անկախության 100-ամյակը նշող քաղաքացիները և նախ այդ անկախությունը պետք է լինի, երկրորդը այդ պետության գոյության համար գաղափարական, անվտանգային, իրավական, քաղաքական, ժողովրդագրական, մշակութային, ինստիտուցիոնալ պայմանները մենք պետք է ստեղծենք։ Ռազմավարության նպատակը՝ մեզ դնելն է այդ ռելսերի վրա, որ մեր այսօրվա աշխատանքը միտված լինի շատ ավելի երկար կտրվածքով»։

Ըստ Փաշինյանի՝ անելիքը ձևակերպել են երեք առաջնորդող կարգախոսների մեջ:

««Հայաստանն իմ օջախն է, ժողովուրդն իմ ընտանիքն է». այս կարգախոսը կուլմինացիան է այն նպատակների, որի մասին խոսում էի: Հաջորդ կարգախոսը՝ «Կառուցենք Հայաստանը նորովի»: Հայաստանում շատ բան կառուցված է, բայց այդ կառուցված և չկառուցված շատ բաներ մենք պետք է տեղավորենք այդ ռազմավարական տրամաբանության մեջ և պետք է, այո՛, մեր երկիրը կառուցենք նորովի: Եվ մյուս կարգախոսը, որը բխում է անհատի արժևորումից՝ «Հայաստանի ապագան կախված է մեկ մարդուց, և այդ մեկ մարդը դու ես»: Ահա սա է մեր ռազմավարության գաղափարական հենքը»,- նշեց վարչապետ Նիկոլ Փաշինյանը:

Ելույթում Վարչապետը ցավով արձանագրեց, որ մեր իրականության մեջ՝ առնվազն պետական մակարդակում, առնվազն 30 տարվա կտրվածքով նման ռազմավարություն չի եղել։ Նրա կարծիքով՝ սա, գուցե, նաև պայմանավորում է այսօրվա բազմաթիվ խնդիրները:

Աղբյուր` Փաստինֆո