Փաստ ինֆո

Մարտի 1-ի գործով Զաքար Հովհաննիսյանի սպանության մեջ մեղադրվող ոստիկանության զորքերի շտաբի նախկին պետ Գեղամ Պետրոսյանի գործով քննություն չի ընթանում, համենայն դեպս՝ նրա մասնակցությամբ քննչական գործողություններ չեն կատարվում։

«Փաստինֆո»-ի հետ զրույցում պաշտպան Վաղարշակ Գևորգյանն ասաց, որ գործով որևէ շարժ չկա. «Ոչ մի հարցով ո՛չ անհանգստացնում են, ո՛չ էլ նրա գոյության մասին հիշում են։ Հետաքրքրվում եմ, թե ինչ ընթացքում է, ասում են՝ նրա հետ կապված որևէ գործողություն չկա։ Նրա վերաբերյալ որոշում կկայացնեն, բայց թե երբ, չգիտենք»,-ասաց Վաղարշակ Գևորգյանը։

Պաշտպանը նշեց, որ Գեղամ Պետրոսյանի նկատմամբ որպես խափանման միջոց է ընտրված ստորագրությունը։ Հարցին՝ այս ընթացքում երկրից բացակայելու որևէ խնդիր առաջացել է, Վաղարշակ Գևորգյանն ասաց. «Անցյալ տարի նման խնդիր եղել է և հանգիստ իր իրավունքից օգտվելով բացակայել է ու հետ է վերադարձել։ Միասին ենք գնացել»,-նշեց պաշտպանը։

Նշենք, որ Գեղամ Պետրոսյանը մեղադրվում է 2008 թվականի մարտի 1-ին հրազենի գործադրմամբ Զաքար Հովհաննիսյանին դիտավորությամբ կյանքից զրկելու մեջ։ Նրան մեղադրանք է առաջադրվել ՀՀ ՔՕ 104-րդ հոդվածի 1-ին մասով, այն է՝ ապօրինաբար մեկ ուրիշին դիտավորությամբ կյանքից զրկելը։

Նրա նկատմամբ որպես խափանման միջոց էր ընտրվել կալանքը, սակայն ավելի քան մեկ տարի անց՝ 2019թ.-ի օգոստոսի 4-ին Գեղամ Պետրոսյանն ազատ արձակվեց Երևան-Կենտրոն քրեակատարողական հիմնարկից, քանի որ լրացել էր կալանքի երկամսյա ժամկետը, իսկ նախաքննական մարմինը՝ ՀՔԾ-ն, կալանավորումը երկարացնելու միջնորդություն չէր ներկայացրել։ Ինչպես տեսնում ենք մինչ օրս որևէ այլ քննչական գործողություն չի իրականացվել։

Ավելի վաղ հաղորդվել էր, որ քրեական գործով չէր հայտնաբերվել նաեւ հանցագործության գործիք հանդիսացած հրազենը:

Աղբյուր` Փաստինֆո