Փաստ ինֆո

Սեպտեմբերի 12-ին Դիլիջանում տեղի ունեցած բազմամարդ հավաքույթի վերաբերյալ կարանտինով սահմանված սահմանափակումները չեն տարածվում։ ՀՀ ոստիկանության լրատվության վարչության պետի տեղակալ Էդգար Ջանոյանը «Փաստինֆո»-ի հետ զրույցում պարզաբանեց, որ սեպտեմբերի 11-ին ՀՀ կառավարության N 1514-Ն որոշմամբ հանրապետությունում սահմանվել է կարանտին, նույն որոշման 3-րդ գլխի 13-րդ կետի 2-րդ ենթակետի համաձայն՝ սահմանափակումներ են նախատեսվել անձանց սոցիալական, մշակութային, կրթական, սպորտային կամ այլ ժամանցային կարիքների բավարարմանն ուղղված այլ միջոցառումների համար (այդ թվում՝ համերգներ, ցուցահանդեսներ, ցուցադրություններ, թատերական ներկայացումներ, կրթական այլ միջոցառումներ), եթե վերջիններս չեն հանդիսանում տնտեսական գործունեության տեսակ, 60-ից ոչ ավելի անձանց մասնակցությամբ, մինչդեռ՝ Դիլիջանում տեղի ունեցած համերգը հանդիսացել է տնտեսական գործունեության տեսակ (տոմսեր են վաճառվել), ուստի վերոհիշյալ սահմանափակումներն այս դեպքի վրա չեն տարածվում: 

« Համերգի ընթացքում ոստիկանությունը սույն որոշման պահանջների վերահսկումից բացի, կատարել է օրենքով վերապահված իր լիազորությունները՝ ձեռնարկելով կանխարգելիչ միջոցառումներ, պահպանելով հասարակական կարգը, հակահամաճարակային անվտանգության կանոնները, քաղաքացիներին բաժանվել են պաշտպանիչ դիմակներ և զգուշացվել է անվտանգության կանոնների պահպանման անձնական պատասխանատվության մասին»,- նշեց Ջանոյանը:

Նշենք, որ սեպտեմբերի 12-ին Դիլիջանում բազմամարդ համերգ է տեղի ունեցել, մամուլում և համացանցում տեսանյութեր, լուսանկարներ էին տարածվել, որտեղ երևում է, որ համերգին ներկա գտնվող քաղաքացիների թիվը գերազանցել է սահմանված 60-ը , բացի այդ՝ վերջիններս չեն պահպանել սոցիալական հեռավորությունը։

Աղբյուր` Փաստինֆո