Փաստ ինֆո

ԱԺ «Իմ քայլը» խմբակցության անդամ, ԱԺ փոխնախագահ Ալեն Սիմոնյանի հեղինակած նախագիծը կարող է կաշկանդող հանգամանք հանդիսանալ լրատվամիջոցների համար։ Լրատվամիջոցները պետք է լինեն անկախ եւ ազատ իրենց գործողություններում։ Այս մասին «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության անդամ, ԱԺ փոխնախագահ Վահե Էնֆիաջյանը։

Սիմոնյանի հեղինակած օրենսդրական նախաձեռնությամբ, ինչպես արդեն տեղեկացրել ենք՝ առաջարկվում է փոփոխություններ կատարել ՀՀ քաղաքացիական օրենսգրքում եւ սոցիալական ցանցերում ու լրատվամիջոցներում հրապարակված վիրավորանքի եւ զրպարտության համար փոխհատուցման չափը վիրավորանքի դեպքում 1 մլն դրամից դարձնել 5 մլն դրամ, զրպարտության դեպքում՝ 2 մլն դրամից՝ 10 մլն դրամ։ Ի դեպ, նախագիծը չի տարածվում կեղծ օգտատերերի` ֆեյքերի վրա, քանի որ, ըստ Ալեն Սիմոնյանի, չի կարող պարզվել, թե ով է պատասխանող կողմը: Տեսակետներ են հնչում այն մասին, որ այս օրինագիծը կարող է ծառայեցվել ազատ խոսքը ճնշելու համար։

«Օրենքի հեղինակը լավագույնս կներկայացնի, թե ինչն է եղել պատճառը հենց հիմա նման օրենսդրական նախաձեռնությամբ հանդես գալու։ Ես գտնում եմ, որ այսօր ավելի լուրջ խնդիրներ կան, պետք է զբաղվել քաղաքացիներին հուզող հարցերով»,-նկատեց Էնֆիաջյանը։ ԱԺ փոխնախագահը շեշտեց՝ խոսքի ազատությունը Հայաստանում պետք է լինի բացարձակ արժեք եւ, ըստ նրա, այն չպետք է խառնել զրպարտության կամ վիրավորանքի հետ։ «Անթույլատրելի է այն ինչ այսօր տեղի է ունենում՝ սոցիալական ցանցերում։ Երբեմն ցենզուրայից դուրս վիրավորանքի հասնող մեկնաբանություններ, կարծիքներ, երբեմն էլ սպառնալիքներ եւ հայհոյանքներ են հնչում։ Զրպարտություններ են հնչել նաեւ իմ հասցեին։ Այնքան անլուրջ է եղել, որ ցանկություն նույնիսկ չեմ ունեցել անդրադառնալ։ Այս նախագիծը ես չեմ կարծում, որ կարող է ամբողջապես լուծել բարձրացված խնդիրը, քանի որ չի ծառայելու կեղծ օգտատերերի՝ ֆեյքային բանակի դեմ, որոնք նախկինում մոբիլիզացվել եւ տարբեր նպատակների համար են ծառայեցվել»,-ասում է Էնֆիաջյանը։ Իրավական ճիշտ գործիքակազմ կիրառելու համար, պատգամավորը գտնում է, որ անհրաժեշտ է ուսումնասիրել նաեւ միջազգային փորձը։

Ըստ նրա՝ միշտ չէ, որ տուգանքների բարձրացումը խնդրի ամբողջական լուծում կարող է լինել։ «Պետք է կարողանալ ինստիտուցիոնալ լուծումներ առաջարկել, որպեսզի չխախտվի մարդու իրավունքները, սահմանափակումներ չլինի խոսքի ազատության մասով, միեւնույն ժամանակ ցանկացած նախաձեռնություն լինի տրամաբանության մեջ։ Վարչական տուգանքներ այսօր էլ կան՝ անպատասխանատու հայտարարությունների, հոդվածների համար»,-նկատեց ԲՀԿ պատգամավորը։

Աղբյուր` Փաստինֆո