Փաստ ինֆո

Խաշթառակում Հակոբջանյանների ընտանիքի ողբերգական ծեծի ու պարբերաբար թունավորումների հետևանքով կորուստները մեծ էին։ Դրա հետևանքով է, որ անչափահաս վեց երեխաներն այս օրը լուսացրեցին մանկատանը։ Մանկան տունը նախատեսված է իրականացնելու մինչև 6 տարեկան երեխաների խնամք։ Աշխատանքի և սոցիալական հարցերի նախարարության մամլո խոսնակ Սոնա Մարտիրոսյանը «Փաստինֆո»-ի հետ զրույցում ասաց, որ երեխաներից մեկի՝ 9 -ամյա Նարեկի համար բացառություն են արել, որպեսզի չկտրվի իր քույր- եղբայրներից։

«Որոշեցինք նրան ևս տեղափոխել Մանկան տուն, որպեսզի բոլորն իրար հետ լինեն, հավելյալ սթրես իրենց համար չլինի»։

Որոշ ժամանակ առաջ երեխաների տատիկը՝ Էմմա Հակոբջանյանը ճանաչվել էր երեխաների միակ խնամակալ, սակայն նա ևս հրաժարվել է երեխաներից։

«Երեխաները, բնականաբար, չէին ուզում տեղափոխվել մանկատուն։ Ամենայն հավանականությամբ իրենք այդ բառից միայն վախեցած էին, որովհետև գիտեք, որ պատկերացումը հաստատության մասին այլ է, քան հենց հաստատությունը կա։ Մեր հիմնական մտահոգությունը կապված էր մեծ՝ 9 տարեկան տղայի հետ, որը նաև շատ ծանր էր տարել եղբոր կորուստը։ 6- ամյա եղբոր մահվան օրվանից սկսված՝ իր հետ ամենօրյա ռեժիմով աշխատում են մեր հաստատությունների հոգեբանները, ովքեր նաև երեխաներին երեկ բուժհաստատություններից ուղեկցել են մինչև մանկատուն։ Ամենօրյա ռեժիմով երեխաների հետ հոգեբան է աշխատել։ Բայց իրենք լուրջ սթրեսի են ենթարկվել, հատկապես մեծ տղան»։

Սոնա Մարտիրոսյանը նշեց, որ նրանք դեռևս որդեգրման ենթակա չեն, որովհետև ծնողները չեն համաձայնել որդեգրման գործընթաց սկսելուն։

«Այս պահին երեխաներն ունեն առանց ծնողական խնամքի մնացած երեխաների կարգավիճակ և սա նշանակում է, որ ծնողներն իրենցից հրաժարվել են։ Սակայն երեխաները որդեգրման ենթակա չեն, որովհետև ծնողները դրան համաձայնություն չեն տվել։ Դրանք տարբեր գործընթացներ են։ Միայն այն, որ ծնողները երեխաներից հրաժարվել են, չի նշանակում, որ համաձայն են, որ երեխաները որդեգրման տրվեն»,- ասաց Մարտիրոսյանը, հավելելով, որ ցանկանում են այնպես անել, որ քույր-եղբայրները միասին մնան, անգամ մանկատնից դուրս։

Երեխաները վեցն են, իսկ նրանց միանգամից որդեգրման գործընթաց և խնամատար ընտանիքում իրենց խնամքը ապահովելու գործընթաց իրականացնելը բավականին բարդ է։

«Մենք ամեն ինչ անելու ենք, որպեսզի երեխաները մեծանան ընտանիքին մոտ միջավայրում։ Իրենց համար մեր կարծիքով ամենաընդունելի տարբերակը կլինի իրար մոտ գտնվող խնամատար ընտանիքներում իրենց խնամքի կազմակերպումը։ Օրինակ ՝ երեք-երեք։ Վիճակագրությունը ցույց է տալիս, որ միանգամից 6 երեխա որևէ մեկը պատասխանատվություն չի ստանձնում խնամքն իրականացնելու։ Մենք ամեն ինչ անելու ենք, որպեսզի գոնե երեք-երեք լինեն մեկ ընտանիքում, հատկապես իրենց համայնքին մոտ գտնվող խնամատար ընտանիքներ գտնենք և այնտեղ ապահովենք խնամքը։ Բայց քանի որ երեխաները փոքր են ՝ մեկ, երկու տարեկան, այս պահին նրանց խնամքը մասնագիտացված հաստատությունում՝ մանկան տանը իրականացնելն ավելի նպատակահարմար է, մինչև համապատասխան ընտանիք գտնվի»։

Սոնա Մարտիրոսյանը փոխանցեց, որ երեխաները մանկան տանը լավ են զգում, բայց քանի որ մկնդեղից թունավորում ունեն, պարբերաբար հաճախում են արյունաբանական կենտրոն, ստանում իրենց անհրաժեշտ բժշկական միջամտությունը։

«Հակաթույնը պետք է պարբերաբար ստանան, բժշկական հոգածության ներքո գտնվեն։ Այս պահին երեխաների վիճակը լավ է, չհաշվենք, որ իրականում մեծ սթրես են տարել»,- եզրափակեց Սոնա Մարտիրոսյանը։

Խաշթառակի խայտառակ պատմության հետևանքով ծեծված 6-ամյա երեխան մահացավ օրեր առաջ։ Օգոստոսի 18-ին ձերբակալված, ապա կալանավորված պապը 10 օր թունավորված և անազատության մեջ է եղել, ապա ծայրահեղ ծանր վիճակում տեղափոխվել «Արմենիա» բուժկենտրոն:

6-ամյա Սերգեյի մայրը երեկ է մահացել՝ 28-ամյա Անուշը Խաշթառակից արյան մակարդելիության խնդրով տեղափոխվեց հիվանդանոց։ Մինչև այդ կինը Իջևանի բուժկենտրոն էր տեղափոխվել, ապա` Սևանի հոգեբուժարան:

Ընտանիքում եղել են պապը և տատը, դուստր, որն ունեցել է հինգ երեխա։ Նրանց հոր մասին տեղեկությունները չկան։ Կինը ուներ նաև մի քույր, որը երեխաներ չուներ։ Կնոջ եղբայրը և իր տիկինը, որոնք ունեին երկու երեխա, բնակվում էին նույն տանը։ Ծեծված, ապա թունավորված և մահացած 6-ամյա Սերգեյը հենց նրանց երեխան էր։

Աղբյուր` Փաստինֆո