Փաստ ինֆո

Վերաքննիչ քրեական դատարանում՝ դատավոր Սևակ Համբարձումյանի նախագահությամբ շարունակվում է Երեւանի ընդհանուր իրավասության դատարանի դատավոր Դավիթ Գրիգորյանի նկատմամբ քրեական գործի վարույթը կարճելու որոշման դեմ դատախազության բողոքի քննությունը։

Դավիթ Գրիգորյանի պաշտպան Երվանդ Վարոսյանը նշեց, որ առաջին ատյանի դատարանի որոշումն օրինական է եւ հիմնավորված, իսկ գլխավոր դատախազի բողոքն անհիմն է և ենթակա մերժման. «Դատարանը որոշումը պատճառաբանված է։ Գործով վարույթը կարճելու որոշումը կայացնելիս դատավոր Դավիթ Բալայանը հիմնավորել է Սահմանադրության 164-րդ հոդվածի 4-րդ մասով, Դատական օրենսգիրք սահմանադրական օրենքի 51-րդ հոդվածի 2-րդ մասով, Վճռաբեկ դատարանի կողմից Լևիկ Պողոսյանի վերաբերյալ 2011 թվականի դեկտեմբերի 22-ին կայացված որոշումով։ Կայացված որոշման մեջ առկա են մեջբերումներ Մարդու իրավունքների եվրոպական դատարանի կողմից կայացված տարբեր վճիռներից։ Սույն քրեական գործը հարուցելու մասին որոշումն ապօրինի է»,-ասաց Երվանդ Վարոսյանը։

Վերջինս նշեց` քրեական գործ հարուցելու մասին որոշումն իր մեջ պարունակում է դատավոր Դավիթ Գրիգորյանի կողմից քրեորեն հետապնդելու արարք կատարելու վերաբերյալ առնվազն ենթադրություն։ Սահմանադրության 164-րդ հոդվածի 4-րդ մասի համաձայն իր լիազորությունների իրականացման կապակցությամբ դատավորի նկատմամբ քրեական հետապնդում կարող է հարուցվել միայն Բարձրագույն դատական խորհրդի համաձայնությամբ. «Դատավոր Դավիթ Գրիգորյանի նկատմամբ փաստացի իրականացվող քրեական հետապնդման մասին ԲԴԽ-ն որեւէ համաձայնություն չի տվել, ուստի անկախ ամեն ինչից դատավոր Դավիթ Գրիգորյանի նկատմամբ քրեական հետապնդումը ենթակա է անհապաղ վերացման։ Գործի նյութերում առկա է ԲԴԽ-ի որոշումը, որով համաձայնություն է տրվել դատավոր Գրիգորյանին ներգրավել որպես մեղադրյալ, սակայն դա էլ իրավիճակը չի փոխում։ Նրան որպես մեղադրյալ ներգրավելու որոշմամբ և մեղադրանք առաջադրելու թույլտվություն չստանալու հիմքում գլխավոր դատախազի պաշտոնակատարը դրել էր արդեն անօրինական կառուցված քրեական գործի շրջանակներում քննիչի ձեռք բերած անթույլատրելի ապացույցներ»,-նշեց պաշտպանը։

Հիշեցնենք, որ Դավիթ Գրիգորյանի պաշտպանական կողմը նախապատրաստական փուլում միջնորդություն էր ներկայացրել դատարանին՝ գործի վարույթը կարճելու մասին և Դավիթ Բալայանը, ուսումնասիրելով գործի նյութերը, հունիսի 5-ին որոշում է կայացրել վարույթը կարճելու՝ երկու հիմքով՝ դատավարական ու քրեաիրավական նորմերի խախտման համար։ Դատախազությունն էլ վերաքննիչ բողոք է ներկայացրել այդ որոշման դեմ։

Աղբյուր` Փաստինֆո