Փաստ ինֆո

Սահմանադրական դատարանի երեք թեկնածուների ընտրվելու շանսերի, ՍԴ-ի շուրջ ստեղծված ճգնաժամի հանգուցալուծման մասին «Փաստինֆո»-ի հարցերին է պատասխանում ԱԺ «Իմ քայլը» խմբակցության անդամ, պետաիրավական հարցերի մշտական հանձնաժողովի անդամ Նիկոլայ Բաղդասարյանը

-Պարոն Բաղդասարյան, ինչպե՞ս եք գնահատում ՍԴ երեք դատավորների թեկնածուների` Ե. Խունդկարյանի, Է. Շաթիրյանի, Ա. Վաղարշյանի ընտրվելու շանսերը:

-Արդեն իսկ ասել եմ, որ գնահատելու շանսերը մի փոքր արդարացված գործընթաց չէ, որովհետեւ պատգամավորներն իրենք են որոշում` կողմ կամ դեմ քվեարկեն կոնկրետ թեկնածուին: Սակայն կան որոշակի սկզբունքներ, որ եթե պահպանենք, կարծում եմ, որ այս թեկնածուները ունեն շանսեր ընտրվելու, բացառությամբ հանրապետության նախագահի ( Ա.Վաղարշյան-խմբ) թեկնածուի, որովհետեւ նա մի անգամ արդեն մերժվել է:

-Երբ կառավարության կողմից ՍԴ դատավորի թեկնածու առաջադրված Էդգար Շաթիրյանը չընտրվեց կոռուպցիայի կանխարգելման հանձնաժողովի նախագահ, վերջինս հրաժարվեց մնալ հանձնաժողովի անդամի կարգավիճակում: Այս դեպքից հետ շատերը պնդում են, որ նա հավակնություններ ունի պաշտոնի եւ չի բացառվում, որ նույն իրավիճակը կրկնվի նաեւ ՍԴ-ում: Այս պարագայում Շաթիրյանը որքանո՞վ է ժողովրդի համար վստահելի թեկնածու:

-Չեմ կարծում, որ նա հավակնություններ ունի ՍԴ նախագահ դառնալու, նա եւս քննարկումների ժամանակ ասել է, որ նման հավակնություններ չունի, հետեւաբար հասարակության վստահությունը պետք է ձեւավորվի իր ունեցած գիտելիքի, տարիքի փորձի, հիման վրա, ինչպես-որ գրված է սահմանադրության մեջ:

-Արդյո՞ք հիշյալ երեք թեկնածուների ընտրվելուց հետո ՍԴ-ի շուրջ ստեղծված ճգնաժամը կլուծվի:

-Այս երեք թեկնածուների ընտրվելուց հետո գործադիր եւ օրենսդիր իշխանությունը պետք է անվերապահորեն ընդունեն, որ ՍԴ-ի դատավորների յուրաքանչյուր որոշում ունի բարձր լեգիտիմություն եւ օրինական է, վիճարկելու հնարավորություն պետք է չլինի:

Մանրամասները` տեսանյութում

Աղբյուր` Փաստինֆո