Փաստ ինֆո

«Մեր նպատակը միակն է՝ նորից ոտքի հանել և ազատագրել մեր երկիրը բոլոր տեսակի ապազգային ուժերից, ապահովել երկրի անվտանգությունը՝ և՛ ներսից, և՛ դրսից,- «Փաստինֆո»-ի հետ զրույցում ասում է ռազմական փորձագետ Գևորգ Գևորգյանը՝ ներկայացնելով «Ազգային ճակատ» նորաստեղծ հայրենասիրական կազմակերպությունը, որի հիմնադիր նախագահն է ինքը,- փաստացի մենք այսօր գտնվում ենք մի իրավիճակում, երբ կորցնում ենք 30 տարի առաջ ազատագրված մեր հայրենիքի անկախությունը։ Այսօր վտանգված է մեր երկրի ճակատագիրը, մեր պետականության գոյությունը։ Պետականության ղեկը պետք է լինի միայն հայ մարդու ձեռքում, մարդ, ով ուղնուծուծով մտածում է իր երկրի անվտանգության մասին։ Մեզ կործանման են տանում պառակտումները, որ այսօր տեղի են ունենում դրսի ուժերի միջոցով, որովհետև թշնամին շատ լավ գիտի, որ Հայստանը կարող է կործանել ներում պառակտումներ մտցնելով»։ 

Տեղեկացնենք, որ այսօրվանից մեկնարկում են «Ազգային ճակատ» հայրենասիրական կազմակերպության աշխատանքները, որի նպատակն է համախմբել ազգային արժեքների և ինքնության համար պայքարող գործիչներին, անհատներին և կազմակերպություններին, հանուն միասնական ազգային պետության կայացման:

Կառույցը կազմված է խորհրդից, որի անդամներն են՝ ռազմաքաղաքական ոլորտին առնչվող ծրագրերի պատասխանատու, ռազմական փորձագետ Դավիթ Ջամալյանը, հայագիտության ոլորտին առնչվող ծրագրերի պատասխանատու, գրականագետ Սերժ Սրապիոնյանը, մշակութային ոլորտին առնչվող ծրագրերի պատասխանատու, մշակույթի գործիչ Վաչե Հովեյանը, իրավական ոլորտին առնչվող ծրագրերի պատասխանատու, իրավագետ Վահե Հովսեփյանը, երիտասարդական ծրագրերի պատասխանատու Կառլեն Հակոբյանը, արտաքին քաղաքականությանն առնչվող ծրագրերի պատասխանատու, դիվանագետ Խորեն Տերտերյանը։ Վերջինս «Փաստինֆո»-ի հետ զրույցում ասում է.«Մեր պետությունը գտնվում է աշխարհաքաղաքական մի տարածաշրջանում, որտեղ ակտիվորեն գեոքաղաքական պայքարներ են մղվում շատ ու շատ երկրների միջև։ Մենք պետք է հասկանանք, որ հենց հիմա ու այստեղ մենք պետք է որդեգրենք համարձակ, բայց կանխատեսելի արտաքին քաղաքականություն։ Մենք ունենք հնարավորություն՝ լինելու միջքաղաքակրթական ըմբռնման հանգույց պետություն։ Սա նշանակում է կառուցել վստահելի հարաբերություններ մեր անմիջական հարևան երկրների, գործընկերների և դաշնակիցների հետ։ Սա այն երաշխիքն է, որ կամրապնդի մեր անվտանգությունը»։

«Փաստինֆո»-ի հետ զրույցում «Ազգային ճակատ» հայրենասիրական կազմակերպության իրավական ոլորտին առնչվող ծրագրերի պատասխանատու, իրավագետ Վահե Հովսեփյանն էլ նկատում է՝ կարևորագույն խնդիրները, որ հիմա առկա են մեր երկրում՝ ազգային արժեքների պահպանման շուրջ, արդեն իսկ վավերացված Լանզարոտեի կոնվենցիա է և Ստամբուլյան կոնվենցիան, որի վավերացում, ըստ վերջինիս, ուղղակի պետք է բացառել մեր երկրում։ «Ազգային ճակատ» հայրենասիրական կազմակերպության իրավական ոլորտին առնչվող ծրագրերի առանցքում այս պահին այս և այլ կարևոր հարցեր են։

Նորաստեղծ կազմակերպության առանցքային նպատակներն են՝ Հայոց ազգային անկախ պետականության ամրապնդմանը, զարգացմանն ու ազգային խնդիրների լուծմանը նպաստելը, ինքնիշխան, ժողովրդավարական, սոցիալական, իրավական պետության կերտումը, պետականամետ և պետականակենտրոն մտածողության արմատացումը, ազգային արժեքների վերարժեքավորումը, ազգային ինքնության պաշտպանությունը, Ազգ – Բանակ գաղափարի արմատացմանն ուղղված ծրագրերի իրականացումը, Հայաստան – Արցախ – Սփյուռք կապերի ամրապնդումը, հանրապետական և տեղական մակարդակներում որոշումների կայացման, հանրային ռեսուրսների բաշխման և հանրային վերահսկողության գործընթացներին՝ հանրության մասնակցության ապահովումը, ազգային համախմբման ու համերաշխության մթնոլորտի ձևավորումը, ազգային ուժերի կոնսոլիդացումը, ազգային նախաձեռնությունների, ծրագրերի իրականացումը և համագործակցությունը նույնանպատակ կառույցների հետ։

Մանրամասները՝ տեսանյութերում

Հեղինակ՝ Նվարդ Մանվելյան

Աղբյուր` Փաստինֆո