Փաստ ինֆո

«Մեր հայրենիքում այսօր մենք հայապահպանման խնդիր ունենք։ Ազգային նկարագրի պահպանությունը ցավոք, այսօր մեր երկրում դարձել է ակտուալ։ Սա զավեշտ է, բայց նաև փաստ է։ Սա ստիպում է ազգային վառ ինքնագիտակցություն ունեցող անհատներին ինչ-որ ձևաչափերով միավորվել,- ասել է ռազմական փորձագետ Դավիթ Ջամալյանը՝ «Փաստինֆո»-ի հետ զրույցում խոսելով նորաստեղծ «Ազգային ճակատ» հայրենասիրական կազմակերպության նպատակների և առաջիկա անելիքների մասին։
«Հենց այս նպատակով էլ ստեղծվում է «Ազգային ճակատ» նախաձեռնությունը, որ օրենքով թույլատրված բոլոր մեթոդներով պայքարելու է ապազգային, պիղծ, ուլտրալիբերալ, սորոսական արժեքների դեմ»,- ավելացրել է նա։

Դավիթ Ջամալյանը, ով «Ազգային ճակատ»-ի ռազմաքաղաքական ոլորտին առնչվող ծրագրերի պատասխանատուն է, զրույցի ընթացքում նկատել է՝ նախաձեռնության նպատակը շատ հստակ է՝ պահպանել ազգային նկարագիրը.«Ուլտրալիբերալ արժեքային համակարգը գռեհիկ, ագրեսիվ կերպով մեր իրականություն է ներմուծվում։ Սորոսական մարգինալները իշխանության կենտրոնական կառույցներում որոշում կայացնողներ են դարձել՝ պարտադրելով մեզ իրենց ապազգային օրակարգը։ Սրա դեմը պետք է առնել։ Ահա սա է առանցքային այն մտահոգությունը, որի շուրջ հավաքվել են «Ազգային ճակատ» նախաձեռնության անդամները»։

Թիրախում հայտնված ոլորտները, որոնց վրա «Ազգային ճակատ» նախաձեռնությունը կսևեռի իր ուշադրությունը, ըստ Դավիթ Ջամալյանի, բազմաթիվ են, սկսած, լայն իմաստով ազգային անվտանգային հարցերից՝ իր բոլոր բաղադրիչներով, ընդհուպ մինչև հանրային կյանքի առաջին հայացքից ամենապաքաղաքական ոլորտները. «Ամենատարբեր տեսակի անարդարությունների հանդեպ մարդկանց սոցիալական արդարության բնական ձգտումն օգտագործվել է սորոսական, իրականում մեզ համար բոլորովին խորթ արժեքների երկիր ներմուծելու համար։ Արդարության լոզունգներով իշխանության են եկել ապազգային մարգինալներ, ովքեր սորոսական կեղտը մեզ են պարտադրում։ Երբ այս մարդիկ պայքարում էին իշխանության գալու համար և բազմամարդ ցույցեր էին անում, թող բարի լինեին հայտարարելու, որ իրենք վավերացնելու են Ստամբուլյան և Լանզարոտեի կոնվենցիաները, որ թրքական նորամուծություններ եք անելու մեր հանրակրթական դպրոցներ և այլն։ Իմ երեխան դպրոցում պետք է սովորի Հայ առաքելական եկեղեցու պատմություն, նա պատմության դասագրքերում պետք է կարդա Արևմտյան Հայաստան, ոչ թե Արևելյան Անատոլիա, թրքամուծություններին որևէ ասպարեզում մենք տուրք չենք տալու։ Սա մեր երեխաների ճակատագրի հարցն է, որի շուրջ բոլոր կարող ուժերը պետք է համախմբվեն»,- ասում է ռազմական փորձագետ, «Ազգային ճակատ»-ի ռազմաքաղաքական ոլորտին առնչվող ծրագրերի պատասխանատու Դավիթ Ջամալյանը։

Հիշեցնենք, որ վաղվանից կմեկնարկեն «Ազգային ճակատ» հայրենասիրական կազմակերպության աշխատանքները, որի նպատակն է համախմբել ազգային արժեքների և ինքնության համար պայքարող գործիչներին, անհատներին և կազմակերպություններին, հանուն միասնական ազգային պետության կայացման: Նախաձեռնության հիմնադիր նախագահը ռազմական գործիչ Գևորգ Գևորգյանն է։ Կառույցը կազմված է խորհրդից, որի անդամներն են՝ ռազմաքաղաքական ոլորտին առնչվող ծրագրերի պատասխանատու, ռազմական փորձագետ Դավիթ Ջամալյանը, հայագիտության ոլորտին առնչվող ծրագրերի պատասխանատու, գրականագետ Սերժ Սրապիոնյանը, մշակութային ոլորտին առնչվող ծրագրերի պատասխանատու, մշակույթի գործիչ Վաչե Հովեյանը, իրավական ոլորտին առնչվող ծրագրերի պատասխանատու, իրավագետ Վահե Հովսեփյանը, երիտասարդական ծրագրերի պատասխանատու Կառլեն Հակոբյանը, արտաքին քաղաքականությանն առնչվող ծրագրերի պատասխանատու, դիվանագետ Խորեն Տերտերյանը:

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո