Փաստ ինֆո

Մանկահասակ երեխայի հետ մուրացկանություն անող կինը՝ Լաուրան պատկան մարմինների մշտադիտարկման տակ է և մեկ ամիս ժամանակ ունի՝ վերաիմաստավորելու իր կյանքը և երեխաներին մուրացկանության նպատակով փողոց չհանելու համար։

Շաբաթներ առաջ «Փաստինֆո»-ի տեսախցիկը ֆիքսել էր երիտասարդ կնոջ, որը մանկահասակ երեխայի հետ մուրացկանությամբ էր զբաղված։ Մեր նկարահանումներից հետո Լաուրան,թեեւ հավաստիացնում էր, որ երեխայի հետ այլեւս մուրացկանությամբ չի զբաղվի, թե, իբր, պարտադրված է դուրս գալիս մուրացկանության՝ երեխաներին խնամող չունի՝ աշխատելու համար, բայց նրան կրկին նկատեցինք Երեւանի Կենտրոն վարչական շրջանի տարբեր փողոցներում։ Ավելին՝ պարզվեց կինը խնամող գտնում է՝ մյուս զավակին հետեւելու համար, որպեսզի ինքը դուրս գա մուրացկանության, բայց աշխատանքի համար՝ ոչ։ Այս պատմության մեջ բավականին խնդրահարույց դրվագներ էինք բացահայտել, որոնք առերեւույթ շահագործման տարրեր էին իրենց մեջ պարունակում՝ հրավիրվելով պատկան մարմինների ուշադրությունը։

Աշխատանքի և սոցիալական հարցերի նախարարի մամուլի խոսնակ Սոնա Մարտիրոսյանը «Փաստինֆո»-ին վստահեցրեց, որ դեպքը գտնվում է իրենց ուշադրության կենտրոնում, սոցաշխատողները ստուգայցեր են արել և պարզել, թե ինչ պայմաններում են մեծանում երկու մանկահասակները, կինը նրանց նույնպես վստահեցրել է, որ մուրացկանությանը ստիպված է գնացել։

«Լաուրան ասել է, որ երեխային մուրացկանության մեջ ներգրավվելը կրել է ստիպվածային բնույթ և ինքը այդպես միշտ չէ, որ անում է։ Երեխաների վիճակը և իր ծնողավարման հմտությունները ստուգելու նպատակով տնայցեր են կատարվել, որոնց մասնակցել են ոստիկանությունը, աշխատանքի և սոցիալական հարցերի նախարարության համապատասխան ստորաբաժանման աշխատակիցները նաև սոցաշխատողները։ Ըստ այդմ` իրենք ականատես ենք եղել մի պատկերի, որ երեխաները բավականին լավ են խնամված, մաքուր են, երեխաների վրա չի եղել բռնության հետքեր, դաստիարակված են։ Ակնհայտ է, որ մայրը խնամում է երեխաներին, չնայած տան պայմանները այսպես ասած բավականին անմխիթար են եղել։ Ենթադրվում է, որ կենցաղային այդ վատ պայմաններում անգամ իրենց հաջողվում է երեխաներին խնամել։ Ամուսնու մասին տեղեկություններ չկան, որովհետև, ըստ էության, քաղաքացիական ամուսինն է և այդ մասով յուրաքանչյուր մարդ ազատ է»,- ասաց նա։

Սոնա Մարտիրոսյանը հավելեց, որ Լաուրան խոստացել է այլևս մուրացկանության դուրս չգալ և առավել ևս երեխաներին չներգրավել այդ գործընթացում, ինչը հիմ՞ք ընդունելով պատկան կառույցները իրեն ժամանակ են տվել վարքը ուղղելու և առավել հարմար աշխատանք գտնելու համար։

«Իրեն նաև առաջարկվել է ներգրավվել զբաղվածության պետական ծրագրերում, եթե կարիք կա վերապատրաստվի և մասնագիտական հմտություններ ձեռք բերի կամ օրինակ՝ պետական ծրագրերով զբաղվածություն ձեռք բերի։ Այս պահի դրությամբ ինքը դեռևս դրական արձագանք չի տվել այս առաջարկի հետ կապված, բայց խոստացել է, որ այլևս մուրացկանությամբ չի զբաղվելու։ Հիմա ինքը գտնվում է և ոստիկանության, և սոցաշխատողների մշտադիտարկման տակ, ըստ այդմ մինչև սեպտեմբեր մշտադիտարկում կիրականացվի, կհասկանանք, եթե քաղաքացու վարքում ուղղումներ կան, երևի շանս կտրվի իրեն։ Ամեն դեպքում մեր հիմնական նպատակն այն է, որ երեխաները մեծանան իրենց կենսաբանական ընտանիքում, եթե, իհարկե, դա չի հակասում երեխայի լավագույն շահին»։

Լաուրան ստուգայցի ժամանակ ասել է, թե այն ժամանակ, երբ ինքը մուրացկանությամբ է զբաղվել և «Փաստինֆո»-ի նկարահանող խումբը իրեն ֆիքսել է, երկրորդ երեխային խնամող եղել է։ Սոնա Մարտիրոսյանն ասաց, որ այս պահի դրությամբ հետին թվով ստուգել, թե երեխան իրոք գտնվել է մեծահասակի, կամ հարազատի խնամքի ներքո չեն կարող ճշտել։ Բայց կնոջը վերջին շանս է տրվել՝ ուղղվելու և այլևս երեխաներին մուրացկանության նպատակով փողոց չհանելու համար։

«Ոստիկանության հետ այցի ժամանակ քաղաքացին կրթված էր, իր իրավունքների մասին տեղեկացված էր, գիտեր, թե պատկան մարմինները ինչ իրավասություն ունեն, ինչ իրավասություն չունեն և օրինակ թույլ է տվել իրականացնել այն գործողությունները, որոնք մտնում են պատկան մարմինների իրավասությունների մեջ։ Այս մասով քաղաքացին կամ շատ լավ տեղեկացված է, կամ որոշակի խորհրդատվություն է ստացել։ Ես չեմ կարող ասել ումի՞ց և ինչպե՞ս։ Հույս ունեմ, որ նաև այս հանգամանքից ելնելով այլևս չի վտանգի իր և երեխաների առողջությունը՝ վտանգելով այն կերպ, ինչպես իրեն նկարահանել էիք»։

Աղբյուր` Փաստինֆո