Փաստ ինֆո

«Լիդիան Արմենիան» իր հայտարարությամբ նպատակ ունի պառակտում մտցնելու համայնքներում՝ իմանալով, որ մարդիկ հիմա, մանավանդ պանդեմիայի շրջանում տնտեսապես ծանր վիճակում են ու մի մասին այս հայտարարությամբ հուսադրում են , որ աշխատանք են ունենալու։ Այս մասին այսօր լրագրողների հետ հանդիպմանն ասաց բնապահպան-իրավաբան Նազելի Վարդանյանը։

Նշենք, որ «Լիդիան Արմենիա հայտարարություն է հրապարակել, որ թարմացնում են աշխատողների բազան և մինչև օգոստոսի 12-ը, ովքեր ուզում են թող գան աշխատանքի, ովքեր հետագայում աշխատելու ցանկություն ունեն՝ իրենց տվյալները ներկայացնեն։

«Սա անթույլատրելի է, որովհետև 2,5 տարի է անցել այս խիստ պայմաններում պայքարից, չեմ կարծում, որ որևէ մեկը այդպիսի հիմարություն կանի ու կհավատա , որ այդ կազմակերպությունն այլևս աշխատելու է և որևէ օգուտ կարելի է ստանալ»։
Վարդանյանը նշեց, որ հայտարարությունում երկու սխալ թվեր են վկայակոչել, որ իբրև ժամանակին 1400 աշխատող են ունեցել։ Իրավաբանը հիշեցրեց, որ այս մասին Լիդիանը երբևիցէ չէր հայտնել։

«Միշտ ասել են 1200 աշխատող ունեն։ Երբ ճանապարհները փակվեցին և մենք հարցումներ արեցինք հարկային մարմիններին, Լիդիանի տնօրենը հարցազրույցներից մեկում ասաց, որ միայն 200 աշխատողն են իրենցը եղել և մնացածը եղել են կապալառու շինարարական կազմակերպությունների աշխատողներ։ Լիդիանին որևէ մեկը իրավունք չի տալիս, որ ինքը կապալառու շինարարական կազմակերպության աշխատողներին հաշվի որպես իրենց աշխատողներ, որովհետև իրենք հեռացան Ամուլսարից և հիմա մեկ այլ տեղ շինարարություն են անում և աշխատատեղերի կորուստ չկա»։

Նազելի Վարդանյանը հիշեցրեց, որ 2016 թվականից 2018 շինարարության ընթացքում 200-ից ավելի՝ միայն Ջերմուկի առողջարաններից մարդիկ աշխատանքից ազատվեցին, որովհետև առողջարանը հանձնվեց, որպես իրենց հանրակացարան։ Եվ մարդիկ, որոնք կրթություն են ստացել, մնացին առանց աշխատանքի։

«Այդ երկու տարին ամբողջ փոշին լցվում էր քաղաք և գունավոր անձրևներ էին գալիս և շատ քիչ էին հանգստացողները։ Ջերմուկցիների միակ ապրուստի միջոցը իրենց բնակարանները վարձով տալն է։ Փաստորեն զրկեցին մարդկանց երկու տարով ապրուստի միջոցից։ Չեմ խոսում, որ 225 հողատարածք միայն Գնդեվազում է վերցվել և օրենքի խախտումով փոխել են կատեգորիան՝ դարձնելով արդյունաբերական նշանակության և ցածր գներով՝ մի մասին խաբելով, որ գերակա շահ կճանաչի և կոպեկներով կվերցնեն։ Արդեն քրեական գործ կա՝ ապացուցված է, որ գյուղապետը ինչ անօրինականություններ է արել և այդ պայմաններում, կոպիտ հաշվարկներով 2000- ից ավելի բնակիչ առանց ապրուստի միջոցի են մնացել։ Չեմ խոսում, որ կողքի համայնքի աշխատողները հանգստի գոտիներին գյուղմթերքով են ապահովում։ Ջերմուկ քաղաքի վրա տարիներով միլիարդներ է ներդրվել, որպեսզի դառնա համաշխարհային նշանակության կուրորտ։ Բազմաթիվ մարդիկ վարկերով իրենց տարածքները կայացած բիզնեսի են վերածել։ Ինչպես կարելի է Ջերմուկ Բրենդի վրա խաչ քաշել»։

Աղբյուր` Փաստինֆո