Փաստ ինֆո

ՀՀ նախկին փոխվարչապետ Արմեն Գեւորգյանը հրաժարվել է փաստաբան Վարդգես Գեւորգյանի ծառայություններից։ Այդ մասին դատարանին գրավոր տեղեկացրել է ինքը՝ փաստաբան Վարդգես Գեւորգյանը՝ նշելով, որ իր կողմից փաստաբանական ծառայությունների մատուցումը դադարեցվել է։ Արմեն Գևորգյանը հաստատեց տեղեկատվությունը։ 

Մյուս փաստաբան Էրիկ Ալեքսանյանն էլ հայտարարեց, որ օգոստոսի 12-ից մինչև սեպտեմբերի 1-ը լինելու է արձակուրդում՝ խնդրելով հաջորդ նիստը նշանակել սեպտեմբերի 1-ից հետո։

Տուժող կողմի ներկայացուցիչ Սեդա Սաֆարյանը հատուկ դիտավորություն տեսավ Արմեն Գեւորգյանի պաշտպանական թիմի գործողություններում՝ պատահական չհամարելով, որ մի փաստաբան դիմում է ներկայացրել դատական նիստը հետաձգելու մասին, մեկը արձակուրդ է մեկնում, իսկ մյուսի ծառայություններից էլ հրաժարվել են։

«Այս բոլորը խոսում է այն մասին, որ այս նիստերը հետաձգելու, առերևույթ օրենքի տառի հետ համաձայնեցնելու, սակայն իրականում պայմանավորվածության արդյունքում այս նիստերը տեղի չունենալու և մեղադրական եզրակացությունը չհրապարակելու ուղղակի դիտավորությամբ, պաշտպանության կողմը կուլիսների ետևում նախաձեռնում է նման գործողություններ, որի արդյունքում ունենալու ենք այսպիսի դեպքեր»,- ասաց նա՝ վստահեցնելով, որ հետագայում առիթ կունենանք տեսնելու, որ այս հետաձգումները պայմանավորված են որոշակի նշանակումների հետ։ Ավելին՝ Սաֆարյանը հետաքրքրվեց, թե արդյոք միտում չկա, որ Արմեն Գևորգյանը պաշտպաններից մեկից հրաժարվել է, իսկ մյուսին ուղարկում է արձակուրդ ու առաջարկեց դատարանին՝ միջոցներ ձեռնարկել։

Արմեն Գևորգյանն էլ արձագանքեց Սաֆարյանի հայտարարությանը՝ հորդորելով թույլ չտալ այսուհետ նման կատեգորիկ արտահայտություններ անել եւ նկատեց, որ յուրաքանչյուր ոք իրավունք ունի արձակուրդ գնալու կամ չգնալու։ Բացի այդ՝ Ալեքսանյանն ավելի վաղ էր դիմել արձակուրդ գնալ, սակայն Գևորգյանը խնդրել է, որ Ալեքսանյանը ներկայանա այս դատական նիստին, որ այն չհետաձգվի։ Էրիկ Ալեքսանյանն էլ ընդգծեց, որ իրեն որևէ մեկն արձակուրդ չի ուղարկում և Սաֆարյանի հայտարարությունները մերկապարանոց են և ինքը որևէ մեկից չպետք է հարցնի՝ իր սահմանադրական իրավունքը՝ հանգստի իրավունքն իրացնի, թե ոչ։ Տուժողի ներկայացուցիչներից մեկն էլ նշեց, որ գործով կա 8 փաստաբան և, եթե նրանցից յուրաքանչյուրը 14 օրով գնա արձակուրդ, ապա դատական նիստերը չեն կայանա 8 ամիս։

Արամ Վարդևանյանն էլ հայտարարեց, որ փորձել է հիշել, բայց չի գտել Սեդա Սաֆարյանի հայտարարությունը, երբ նախագահող դատավորը դեկտեմբերի սկզբին մեկնել է արձակուրդ և չորս դատական նիստ չի կայացել։

«Որտեղ էր այդ վրդովմունքը։ Իրավական անոմալիաներից ենք խոսում։ Օրինակ՝ հենց կրկին Ձեզ դիմեր միջոցներ ձեռնարկելու համար։ Կարելի էր Ձեզ ներկայացված միջնորդությունը ներկայացվեր այսպես՝ դիմում ենք իրավունքները խախտելու համար, օրինակ՝ դիմում ենք Էրիկ Ալեքսանյանի իրավունքները խախտելու համար»,- ասաց Վարդևանյանը։

Լսելով կողմերին դատարանը որոշեց դատական նիստը հետաձգել մինչեւ սեպտեմբերի 8-ը։

Հեղինակ՝ Իզաբել Սահակյան

Աղբյուր` Փաստինֆո