Փաստ ինֆո

Մեր ձայնն այս պահին կառավարման մարմնի ավելի բարձր օղակում ավելի լսելի է, նախարարի կամ վարչապետի հետ հանդիպումներն ավելի հասանելի ենք, իսկ քաղաքային իշխանության բարձրագույն օղակի հետ կապը շատ ավելի դժվար է։ Այս մասին «Փաստինֆո»-ի հետ զրույցում ասաց Ռեստորանների հայկական միության նախագահ Վահե Գևորգյանը։

Նրա խոսքով՝ ռեստորանային բիզնեսը սեզոնի կամ եռամսյակի սկզբին քաղաքային իշխանություններին տուրքեր է վճարում, բայց քանի որ մարտ ամսվա սկզբից մոտ երկու ամիս ոլորտի գործունեությունը կանգնած է եղել, որոշել են դիմել քաղաքապետարան՝ տուրքերը վերանայելու նպատակով. «Այն տուրքերը, որոնք եռամսյակային բնույթ են կրում, հաշվարկվի մյուս եռամսյակի համար, որովհետև երկրորդ եռամսյակի մեծ մասը ռեստորանային բիզնեսը չի գործել, իսկ եթե տարեկան կտրվածքով է եղել, այդ համամասնությամբ հաշվարկվի»,-ասաց Վահե Գևորգյանը՝ հավելելով, որ ակնկալում էին՝ քաղաքային իշխանությունը կարող է ընդառաջ գնար, քանի որ այս ընթացքում բիզնեսի հարկատուներն օրինապահ են եղել և չեն զլացել այդ բոլոր հարկերը վճարելուց։

Վահե Գևորգյանը նշեց, որ ռեստորանային բիզնեսի ներկայացուցիչները ակնկալում էին՝ քաղաքապետարանը կընդառաջեր նաև սեղանների հեռավորության պահպանման առումով. «Լավ կլինի՝ այդտեղ էլ որոշակի ընդառաջում լինի, որ եթե բիզնեսը հետևում է պարետի սահմանած կանոններին, ապա նրա սեղանների քանակը երկու անգամ կրճատվում է։ Գոնե այն տարածքը, որը հարում է իրեն, թողնեն այդտեղ ևս մի քանի սեղան, աթոռ լինի։ Մենք չենք ասում, որ դիմել ենք քաղաքապետին ու մերժել է մեզ, այլ ասում ենք, որ հենց այդ դիմելու պահը չի ստացվում։ Այսինքն կապ հաստատել, որ փորձենք իր հետ կա՛մ տեսակապով, կա՛մ ինչ-որ այլ կերպ խոսել, այդ պահը չի ստացվում։ Մեզ ասում են, որ այս պահին ընդունելություն չկա։ Հասկանում ենք, որ առողջապահական անվտանգությունից ելնելով են ասում, բայց այս ընթացքում շփվել ենք և՛ տարբեր նախարարների, և՛ փոխվարչապետի, և՛ վարչապետի հետ։ Եղել են հեռախոսազրույցներ և մեզ ասել են, որ այս պահին ընդունելության կարգը չի գործում և այլ տարբերակ չի առաջարկվել»,-ասաց Վահե Գևորգյանը՝ ընդգծելով, որ իրենց համար խնդիրն այն չէ՝ այդ հանդիպումը պարտադիր կայանա, այլ այն, որ չորս ամիս խոսել են խնդրի մասին ու բարձրաձայնել, բայց արձագանք չի եղել։

«Պարզաբանվում է, որ մարդն իր բացօթյա հատվածում տարածքի երկու անգամ ավել կորուստ ունի, որովհետև հետևում է պարետատան կանոններին ու խնդրում՝ նույն հեռավորությունը պահելով ուղղակի մեկ-երկու սեղան-աթոռ ավել դնի, որ իր շրջանառության մասը կարողանա ինչ-որ չափով վերականգնել։ Կամ տուրքերի մասով, որ արդեն վճարված մասը գոնե հաշվանցեն այս եռամսյակին։ Դա նաև բիզնեսի հետ համերաշխության նշան է։ Այսինքն համայնքային իշխանությունը, որը սնվում է նաև բիզնեսի վճարած հարկերով, այս դժվարին պահին աջակցություն ցուցաբերի՝ պահպանելով հանրային շահը»,-ասաց Վահե Գևորգյանը՝ հավելելով, որ այնուամենայնիվ կսպասեն քաղաքային իշխանությունների հետ իրենց հանդիպմանը

Աղբյուր` Փաստինֆո