Փաստ ինֆո

Մաշտոցի պուրակի համար բոլորս շատ ակտիվ պայքարել ենք ու հիմա էլ պայքարում եմ ամեն պուրակի համար, միայն այս պուրակի համար չէ։ Այս մասին այսօր մամուլի ասուլիսի ժամանակ ասաց Երևանի քաղաքապետ Հայկ Մարությանը։

«Մենք այն ժամանակ ունեցել ենք հաղթանակ և այդ հաղթանակները ես ինչ դարձել եմ քաղաքապետ, առաջ եմ տանում և ամրագրում եմ։

Այն տաղավարները, որ պետք է կառուցվեին այն ժամանակ, հանրային ճնշմամբ, ուղղակի չթողեցին, որ պարոն Մարգարյանը թույլ տա՝ այդ ամեն ինչը կառուցվի և ունեցանք Մաշտոցի պուրակը, բայց կա մի սրճարան, որ այնտեղ միշտ կար, որն ուներ 277 ք/մ որպես սեփականության իրավունք գրանցված կադաստրով, այսինքն` դա անձեռնմխելի է և 17 ք/մ որպես սեփականություն, կադաստրում էլի գրանցված սեփականություն։ Դա իր սեփականությունն է ընդմիշտ, և մենք ոչ մի բան չենք կարող անել։ Նույն խնդիրն ունենք նաև Օպերայում»,-ասաց քաղաքապետը։

Նա հավելեց, որ բացի դրանից 2018 թվականի մայիսի 16-ին Տարոն Մարգարյանի կողմից ստորագրվում է մի որոշում, որով մինչ այդ 386 ք/մ վարձակալությունը դառնում է 1048 ք/մ վարձակալություն. «Այդ վարձակալությունը ֆիքսում է իր 277 ք/մ սեփականությունը, այդ վարձակալության հողի մեջ ֆիքսում է 17ք/մ իր սեփականությունը արդեն որպես սեփական գույք և այդ վարձակալությունը մինչև 2040 թվականի դեկտեմբեր։ Երբ լինում է հեղափոխությունը և գալիս է մեր քաղաքային իշխանությունը, արդեն սկսում ենք աշխատել, քիչ-քիչ բաները դուրս է գալիս։

Ամենաառաջիններից դուրս եկավ Օպերայի տարածքում «Ռիչ Գարդեն»-ը, որը Սամվել Ալեքսանյանինն է, հենց երևի իր անունով չէր։ Արդեն չեմ հիշում կա՛մ իր անունով էր, կա՛մ իր բարեկամի։ Այն պետք է կադաստրում գրանցվեր, բայց հասցրել եմ ստոպ տալ այդ պրոցեսը, այդ որոշումը չեղյալ համարեմ և վերադարձնեմ համայնքին։ Նույնն արել եմ այստեղ։ Այս որոշումը չեղյալ եմ համարել, պայմանավորվածություն ենք ձեռք բերել, որ այդ 277 ք/մ սեփական գույքը և 17 ք/մ սեփական գույքը, որն իրենն է քանդում ենք, վերացնում ենք սեփականությունը, այսինքն` ինքն էլ սեփականատեր չի լինելու և դրա տեղը տալու ենք այդ նույն տարածքում կառուցապատման իրավունքով վարձակալություն, ինչը նշանակում է, որ այն գույքը, որը հիմա կառուցում է, դա համայնքային գույք է։ Այս տարիները, որ վարձակալությամբ պետք է լինի, կօգտագործի դա, վարձակալությունն ավարտելուց անմիջապես հետո դա դառնում է համայնքի գույքը և այդ ժամանակ արդեն կորոշենք՝ քանդում ու կանաչապատում ենք, թե այդ գույքը մենք ենք վարձակալությամբ տալիս ինչ-որ մեկին բարձր արժեքով ու այդ գումարներն ուղղում այլ ծրագրերի, այսինքն` ով լինի քաղաքային իշխանությունը որոշում կկայացնեն՝ ինչ են անում»,-ասաց Հայկ Մարությանը՝ ընդգծելով, որ իր որոշմամբ 277 և 17 ք/մ սեփականության գույքի սեփականության իրավունքը վերացրել է, քանդել են ֆիզիկապես և տվել են կառուցապատման իրավունք, որով այդ հողի վրա կառուցվող գույքը համայնքինն է. «Սրանից լավ լուծում համայնքի համար, անհնար է անել, եթե խոսում ենք օրենքներով։ Եթե չենք խոսում, որ եկեք հայտարարենք բեսպրիդել է, և մենք բուլդոզերներով մտնում ենք ու մարդկանց օրինական գրանցված գույքերը սկսում ենք քանդել։ Հենց օրենքն ինձ էդ իրավունքը տա, առաջինը ես կնստեմ բուլդոզեր»,-ասաց Հայկ Մարությանը։

Աղբյուր` Փաստինֆո