Փաստ ինֆո

«Առաջնայինն ինձ համար քաղաքն է, ով ինչ խոսելու բան ունի կարող է փաստաթղթավորի նոր խոսի, ես նման ցածրակարգ դեբատների մեջ չեմ մտնելու»։ Այս մասին «Փաստինֆո»-ի հետ զրույցում ասաց Վանաձորի քաղաքապետ Մամիկոն Ասլանյանը՝ անդրադառնալով Լոռու մարզպետ Անդրեյ Ղուկասյանի ֆեյսբուքյան գրառմանը՝ ուղղված իր հասցեին։

Մարզպետը գրել էր, որ Վանաձորի ճարտարապետական տեսքի աղճատման հարցում Վանաձորի համայնքապետն իր ներդրումն ունի: Դա են վկայում քաղաքի այսօրվա տեսքն ու նաև վերջին երկու տարիների ընթացքում Լոռու մարզպետարանի կողմից Վանաձորի համայնքապետին ուղղված բազմաթիվ գրություններն ու քննարկումներն այս թեմայով՝ հորդորով՝ կասեցնել ապօրինաշինությունները:  Մեղադրանքին, թե համայնքապետարանը շատ արագ օրինականացնում է ապօրինի շինությունը, Վանաձորի քաղաքապետը պատասխանեց.

«Դրա համար իրավապահ մարմիններ կան, ինքը հո դատախազ չէ»։

Լոռու Մարզպետը Վանաձորի քաղաքապետին ուղղված տեքստով ասել էր, որ ՀՀԿ-ական համայնքապետի գործելաոճը, ով համայնքի զարգացմանն ու բարեկարգմանն ուղղված քայլեր ձեռնարկելու փոխարեն զբաղված է միմիայն քաղաքը բաժին-բաժին անելու առուծախով, ինչն իր մեջ ակնհայտ կոռուպցիոն ռիսկեր է պարունակում: Հավելել էր, որ հնարավոր է, որ համայնքապետը, անկարողունակ ու անպատասխանատու գործելաոճի արդյունքում հայտնվի այն նույն տեղում, որտեղ իր ՀՀԿ-ական նախկիններն են: Քաղաքապետը պիտակավորումներին նման կերպ արձագանքեց. «Ես կյանքում իմ կատարած որևէ քայլի համար չեմ ամաչել, չեմ ամաչում և չեմ ամաչելու, թող մտածեն այն մարդիկ, ովքեր իրենց վրա որոշակի պիտակներ են կրում։ Ես իմ քաղաքին ծառայել եմ, ինչքան հնարավոր է ծառայում եմ, որևէ մեկի բարբաջանքներին չեմ արձագանքելու, մանավանդ կուսակցություն, չգիտեմ ինչ ինձ համար երկրորդական ու երրորդական են, թող մտածեն այն մարդիկ, ում կուսակցությունը մարդ է դարձնում, կամ՝ տմարդ»։

Մամիկոն Ասլանյանն ասաց, որ հիմա զբաղված են շինարարական հարցերով. «Ավելի լավ է քարը քարին դնենք, քան մեկի գցած քարը գնանք բոլորով գետից հանենք, ես ոչ մարզպետի, ոչ գրառման մասին չեմ մտածում»։

Քաղաքապետն ավելի վաղ ֆեյսբուքի իր էջում գրել էր, որ Լոռու մարզպետը հերթական անգամ փայլել է իր «հերոսանալու» մոլուցքի մեջ.

«Այս մարդու «սկզբունքայնության» ու «ազնվության» մասին Լոռիում «լեգենդներ» են պտտվում ու ֆոլկլոր է զարգանում, իսկ իմ անսկզբունքայնությունն (ընդունում եմ) այս պարագայում կայանում է նրանում,որ ապօրինի տեղադրված տաղավարն ապամոնտաժելու կամ տեղափոխելու համար քաղաքապետարանն ու ոստիկանությունը համատեղ ,ժամը 20.00ից մինչև 22.00 տեխնիկական և մի քանի այլ խոչընդոտների պատճառով տաղավարը չեն հասցրել ապամոնտաժել և վրա է հասել «մեծն» ու «ամենազոր» մարզպետը և ԱԻՆ-ին հրահանգել է տաղավարն ապամոնտաժել ու կինո է նկարահանել, չնայած որ ապօրինի տաղավարը հեռացնելուն ուղղված քայլեր կատարել եմ և ես,և Վանաձորի ավագանու անդամները,մարզպետը չէ, որ միակ շահագրգիռ անձն է եղել։ Օդում համառորեն պտտվող լուրերի համադրումը թույլ է տալիս եզրակացնելու,որ ամենևին պատահական չէ այս պաշտոնյայի կողմից վերջին շրջանի ակտիվությունը, իմ նկատմամբ ընդգծված սուր շեշտադրումները, քաղաքում ընթացող շինարարություններին անհարկի խոչընդոտելը, սուբվենցիոն ծրագրերի նկատմամբ բացահայտ ոչ գործընկերային վերաբերմունքը։ Չար լեզուներն ասում են, որ մարզպետին դուր չեն գալիս քաղաքում տեղի ունեցող դրական փոփոխությունները, քանի որ դա որոշակիորեն չի համընկնում մարզպետի պլանների հետ»։

Աղբյուր` Փաստինֆո