Փաստ ինֆո

«Երևանը խիստ կարիք ունի կանաչ զանգվածի ու մենք այսօր Երևանում մաքուր օդ չենք շնչում ու ցանկացած ծառի կտրելը քաղաքի ու բնակիչների համար վնաս է «Փաստինֆո»-ին ասաց Էկոլուրի փորձագետ Վիկտորյա Բուռնազյանը՝ անդրադառնալով Մաշտոցի պուրակում կատարված ապօրինի ծառահատումներին։ Այստեղ՝ չորս թեղի է հատվել՝ սրճարան կառուցելու համար։ 

Փորձագետը նշեց, որ հատկապես Մաշտոցի պուրակը շատ կարևոր է, 90 օր մեր բնապահպաններն ու ակտիվ քաղաքացիները ձմռան ցրտին պայքարեցին, որ պուրակը մնա պուրակ, ու կրպակները չմնան, ապամոնտաժվեն։ Այդ պայքարից հետո հիմա ինչ-որ շինարարություն է, ծառահատում , ապա բացատրություն. դա մեզ համար անընդունելի է»։

Նշենք, որ ծառահատումից օրեր անց «Կանաչապատում և շրջակա միջավայրի պահպանություն» ՀՈԱԿ-ը ֆեյսբուքյան էջում բացատրություն է տվել, թե ինչ աշխատանքներ են ընթանում պուրակում.

«Մաշտոցի պուրակի սկզբնամասում բարեկարգվող սրճարանի սեփականատերը գրավոր պարտավորվել է հատված 4 թեղիների փոխարեն տարածքում տնկել 9 արևելյան սոսի (չինարի): Հատված թեղիները, մասնագետների գնահատմամբ, անառողջ էին և ոչ կենսունակ: Բացի դրանից, տնտեսվարողը պարտավորվել է պարբերաբար բարեկարգել ու կանաչապատել այգու հարակից տարածքը: Աշխատանքների մի մասն արդեն կատարվել է, մնացածը կարվի կառուցապատման աշխատանքների ավարտից հետո: Ծառատունկը կիրականացվի նոյեմբերին՝ մեր մասնագետների խիստ հսկողությամբ», գրված է հայտարարությունում։

Էկոլուրի փորձագետն ասում է, որ կանաչ տարածքում պետք չէ, որ լինեն սրճարաններ, ժամանցի ինչ- որ վայրեր։ Ուզում են, որ Երևանում պահպանվեն կանաչ տարածքները ու ավելանան նորերը, որովհետև մենք կանաչ գոտիների ու թթվածնի կարիք ունենք։

«Ցանկացած նման բան հարված է մեր քաղաքի օդի մաքրությանը։ Ու հիմա ինչքան էլ նոր ծառեր տնկեն՝ 2-ի փոխարեն 4, 4-ի փոխարեն 6, ծառերը մինչև դառնան ծառ, մինչև ունենան սաղարթ, մինչև մեզ թթվածնով ապահովեն, դրա համար տարիներ են պետք ՝ ոչ մեկ, ոչ երկու։ Սա պետք է լինի բոլորի ուշադրության կենտրոնում։ Ցավալի է, որ նոր իշխանության օրոք տեսնում ենք նման դեպքեր, շարունակվում են ծառահատումները»։

Փորձագետն ասում է, որ պետք է նախօրոք զգուշացնեին, որ այդ ծառերը վնասված են և պետք է հատվեին, որ քաղաքացիները իմանային ինչն է վթարային։

«Այս շինարարությունը կանաչ գոտիներում ՝ անհասկանալի է։ Ամեն ծառը կտրելուց առաջ պետք է իրազեկում լինի, որ մարդիկ իմանան, որ հիվանդ են ծառերը և պետք է կտրվեն ու դրանից հետո նախատեսվում է ծառատունկ իրականացնել։ Մեզ մոտ այդ ծառերը հիվանդ լինելու պատրվակի տակ նույնիսկ խորը էտեր են իրականացվում՝ էլի ոչնչացնելով ամբողջ սաղարթը։ Հետագայում դրանց աճելը և օգտակարությունը խիստ կասկածի տակ է դրվում։ Այս դեպքում անհրաժեշտ է, որ և քաղաքապետարանը և մյուս ստորաբաժանումները և տնտեսավարողները, որոնք իրականացնում են նմանատիպ գործունեություն, պետք է աշխատեն խիստ թափանցիկ և հաշվետվողականությունն էլ պետք է բարձր լինի, որ Երևանի բնակիչը տեսնի ու չմտածի, որ թաքուն ու ապօրինի ծառ է հատվել։ Հիմա եթե ծառերի տեղում շինարարություն պետք է լինի, չգիտեմ ծառերն էլ ո՞րտեղ են տնկվելու»։

Փորձագետը հիշեցրեց, որ ծառահատումները պետք է խիստ նվազեցնել ու եթե ծառերը հիվանդ են հնարավոր լինի բուժել։

«Բացի ծառերը տնկելուց պետք է հետևողական լինեն, դրանց խնամեն, բայց առկա ծառը կտրել-ոչնչացնելով ու ամեն ինչ բետոնի տակ անցկացնելով մենք չենք կարող ամեն ինչ ոչնչացնել ու ասել, որ ծառատունկ ենք իրականացնում»։
Ապօրինի ծառահատումների հարցի վերաբերյալ իրավապահ մարմինների արձագանքը ճշտելու նպատակով «Փաստինֆո»-ն դիմել է դատախազություն, որտեղից խոստացել են ավելի ուշ պատասխանել։

Աղբյուր` Փաստինֆո